19 maýsym – Áýe shabýylyna qarsy qorǵanys áskerleriniń qurylǵan kúni, dep habarlaidy "Ult aqparat" QR Qorǵanys miinistrliginiń resmi saityna silteme jasap.
Baspasóz qyzmetiniń málimetterine qaraǵanda, Áýe shabýylyna qarsy qorǵanys áskerlerin elimizdiń áýe qalqany dep ataidy. Bul áskerlerdiń basqarmasy osydan 29 jyl buryn quryldy. Búgingi tańda ol Áýe qorǵanys kúshteriniń jeke ásker tegi.
1992 jylǵy 19 maýsymda Qazaqstannyń tuńǵysh qorǵanys ministri Saǵadat Qojahmetuly Nurmaǵambetov áýe shabýylyna qarsy qorǵanys áskerlerin qurý týraly direktivaǵa qol qoidy.
Áskerlerdiń quramyna Qazaqstan aýmaǵynda ornalasqan ÁShQQ qurylymdary men bólimderiniń 37 korpýsy – zenit, zymyran, radiotehnika jáne aviatsiia bólimderi, sondai-aq áýe ailaqtyq-tehnikalyq bólimsheler, bailanys jáne radiotehnikalyq qamtamasyz etý batalony kirdi.
Bul ásker teginiń negizin qalaýshylar – Halyq qaharmany, armiia generaly Muhtar Altynbaev, general-maior Anatolii Vasimov, general-leitenant Oqas Saparov, general-maior Nurjan Muqanov jáne basqa da tulǵalar.
1998 jyly áýe shabýylyna qarsy qorǵanys áskerleriniń Áýe qorǵanysy kúshteriniń quramyna kirdi.
Áýe shabýylyna qarsy qorǵanys áskerleri áýe nysanalaryn biiktik pen jyldamdyqtyń barlyq aýqymynda der kezinde anyqtaýǵa jáne zaqymdaýǵa qabiletti sońǵy úlgidegi zenittik-zymyran keshenderimen jáne barlaý quraldarymen jaraqtalǵan.
2020 jyly áýe shabýylyna qarsy qorǵanys áskerlerin qaita jaraqtandyrý baǵdarlamasyna sáikes «BÝK-M2E» jańa zenittik zymyran kesheni ákelindi. Buǵan deiin Qazaqstanda óndirilgen GM-403 «Nur» jáne Qazaqstannyń barlyq áýe keńistigin baqylaýǵa múmkindik beretin «Rosa-RB» zamanaýi radiolokatsiialyq stantsiialary paidalanýǵa berildi.
Atalmysh áskerlerge eldiń ákimshilik-saiasi, ónerkásiptik-ekonomikalyq aýdandaryn áýe soqqysynan qorǵaý, áýe qarsylasyna qarsy kúres júrgizý, ornalasý pýnktteri men jyljytý baǵytyndaǵy Qurlyq áskerleriniń toptaryn, mańyzdy áskeri jáne basqa da nysandardy aviatsiia jáne ushqyshsyz ushý apparattarynyń soqqylarynan qorǵaý mindetteri júktelgen.
Áýe shabýylýyna qarsy qorǵanys áskerleriniń jeke quramy táýlik boiy jaýyngerlik kezekshilik atqaryp, áýe keńistigin paidalaný erejesin saqtaýdy úzdiksiz baqylaidy.
