Mańǵystaý oblysynda jas jigit sýǵa ketti, dep habarlaidy QazAqparat.
7 maýsym kúni keshki 16.20 kezinde qutqarý qyzmetine Aqtaý qalasy Samal-2 yqshamaýdanynda teńiz jaǵalaýynda bir adamnyń sýǵa ketkeni týraly habar túsken.
«Sýǵa ketken adam - 2004 jyly týǵan Beineý aýdany Boranqul aýylynyń týmasy. Bozbala Mańǵystaý óner kolledjiniń 1-kýrsynda oqyp júrgen, sol oqý ornyna qarasty №5 jataqhanada turǵan. Qazirgi ýaqytta marqumnyń denesin izdeý jumysy júrip jatyr», - deidi Aqtaý qalasy tótenshe jaǵdailar basqarmasy azamattyq qorǵanys tobynyń ofitseri, aǵa leitenant Azamat Tólegenov.
TJD málimetinshe, jastar jaǵalaýda TikTok jelisine arnap video túsirip júrgen.
Úsheýi pirsten teńizge sekirgen, ekeýi jaǵaǵa júzip shyqqanymen úshinshi jigit sýǵa batyp ketken.
Izdeý jumysyna 15 qutqarýshy jáne eki súńgýir tartylǵan.
