Prezident Qasym-Jomart Toqaev Qazaqstan-Singapýr biznes forýmynyń jabylý rásimine qatysty. Bul týraly Aqorda habarlady.
️Memleket basshysy óz sózinde Qazaqstan Singapýr stilindegi ekonomikalyq reformalar júrgizetin, mol múmkindikter usynatyn jáne ekonomikasy qarqyndy damyp kele jatqan el ekenin aitty.
"Elimizde erkin naryqty damytýǵa, innovatsiiany yntalandyrýǵa jáne bilimge negizdelgen ekonomikaǵa kóshýge baǵyttalǵan aýqymdy reformalar bastaldy. Bul reformalar eń joǵary halyqaralyq standarttarǵa, sonyń ishinde EYDU standarttaryna sai keledi. Jaqynda men ulttyq ekonomikany aitarlyqtai yryqtandyrýǵa negiz qalaityn mańyzdy Jarlyqqa qol qoidym. Qazaqstan aimaqtaǵy investitsiia tartatyn negizgi ortalyq bolyp qalýy úshin jańa investitsiialyq tsikldy iske qostyq. Strategiialyq maqsatymyz – 2029 jylǵa qarai shetelden 150 milliard dollar tikelei investitsiia tartý. Biz investorlarǵa keshendi memlekettik qoldaý kórsetý jáne shuǵyl sheshim qabyldaý qanshalyqty mańyzdy ekenin jaqsy túsinemiz. Osy maqsatta strategiialyq, investitsiialyq jobalarǵa jetekshilik etetin quzyreti joǵary Investitsiialyq keńes qurdyq", – dedi memleket basshysy.
Qasym-Jomart Toqaev Qazaqstan men Singapýr geografiialyq jaǵynan alshaq ornalasqanyna qaramastan, saiasi jáne ekonomikalyq turǵyda senimdi seriktes elder ekenine ári solai bolyp qala beretinine nazar aýdardy.
"Biz Ońtústik-Shyǵys Aziiadaǵy jetekshi seriktesimiz – Singapýrmen berik qatynastardy joǵary baǵalaimyz. Byltyr ekijaqty saýda kólemi 1,8 milliard dollardy qurady. Singapýrdyń Qazaqstanǵa quiǵan investitsiiasy 1,7 milliard dollardan asty. Taiaý jyldary bul kórsetkish eselene túsedi dep sanaimyz. Osy oraida ekijaqty seriktestikti damytý úshin berik quqyqtyq negizdiń bolýy asa mańyzdy. Biz Investitsiiany kótermeleý jáne ózara qorǵaý týraly úkimetaralyq kelisimdi ratifikatsiialadyq. Bul qujat investitsiialardyń joǵary deńgeide qorǵalýyn qamtamasyz etedi", - dedi Qasym-Jomart Toqaev.
Memleket basshysy yntymaqtastyqtyń birqatar perspektivti baǵytyn aiqyndap berdi. Prezident qalany damytý sektoryn birinshi baǵyt retinde atady. Sondai-aq Qazaqstanda múlde jańa ári integratsiialanǵan megapolis salý bastamasyn óte mańyzdy joba dep sanaidy.
"Bul joba bolashaqta "Ortalyq Aziiadaǵy Singapýrǵa" ári halyqaralyq jetekshi biznes-habqa ainalýdy kózdeidi. Osy maqsatqa bólingen myń sharshy kilometrge jýyq aýmaq Arnaiy ekonomikalyq aimaq rejiminde damidy. Singapýrlyq Surbana Jurong kompaniiasy atalǵan jobanyń keshendi josparyn ázirlegenin erekshe atap ótkim keledi. Forým aiaqtalǵan soń, barlyq múddeli tarappen osy máseleni talqylamaqpyn. Singapýr biznesi keleshegi zor bul bastamaǵa belsendi atsalysady dep úmittenemin", - dedi memleket basshysy.
Qasym-Jomart Toqaev Qazaqstannyń Singapýrǵa asa mańyzdy shikizat pen tabiǵi resýrstardy jetkizýge daiyn ekenin aitty.
"2040 jylǵa qarai sirek kezdesetin metaldarǵa degen álemdik suranys tórt ese artatynyn eskere otyryp, shamamen barlanbaǵan 5000 ken orny bar Qazaqstan osy áleýetti birlese damytý úshin senimdi seriktes bola alady. Biz Qazaqstandaǵy mys jáne fosfat ken oryndaryn barlaýǵa qyzyǵýshylyq tanytyp otyrǵan Indorama kompaniiasymen uzaqmerzimdi yntymaqtastyq ornatýǵa úlken úmit artamyz", - dedi prezident.
Memleket basshysy elimizdiń jańartylatyn energiia salasyndaǵy zor áleýetine qyzyǵýshylyq artyp kele jatqanyn atap ótip, Singapýr kompaniialaryn ekologiialyq taza energiia óndirý, atalǵan salada tehnologiia jáne tájiribe almasý úshin seriktestikti keńeitýge shaqyrdy.
"Singapýr qoqys jaǵý arqyly qýat óndiretin ozyq qondyrǵylarymen jáne qaldyqtardy basqarý jónindegi innovatsiialyq tehnologiialarymen tanymal. Bizdi qaldyqtardy retteýdiń osy innovatsiialyq tásili qyzyqtyrady ári atalǵan saladaǵy yntymaqtastyqty damytýǵa niettimiz", - dedi prezident.
Sýret: Aqorda
Memleket basshysynyń aitýynsha, geografiialyq alshaqtyq pen bailanystyń nasharlyǵy uzaq jyldar boiy eki memlekettiń ekonomikalyq yqpaldastyǵyn tejep keldi.
Búginde jahandaný men damyǵan infraqurylymnyń arqasynda elder arasyndaǵy ózara bailanys burynǵydan áldeqaida jaqsardy. Bul rette Qasym-Jomart Toqaev otandyq "Qazaqstan temir joly" kompaniiasy men singapýrlyq PSA International kompaniiasy arasyndaǵy Transkaspii halyqaralyq kólik baǵytynyń nemese "Orta dálizdiń" áleýetin paidalanýǵa baǵyttalǵan sinergiialyq seriktestikti mysalǵa keltirdi.
"Atalǵan baǵyt Eýraziia keńistigindegi yntymaqtastyqty múldem jańa deńgeige shyǵara alady. Bul – Ortalyq jáne Shyǵys Aziiadan Eýropaǵa shyǵatyn eń tóte ári ornyqty jol. Singapýr kompaniialary men qarjy institýttary bul saladaǵy biznes pen investitsiianyń múmkindikterin zerttep, aitarlyqtai paidaǵa kenele alady dep sanaimyz. Vetnamdyq SOVICO Group kompaniiasynyń Qazaq Air aviakompaniiasyn jekeshelendirýin quptaimyn. Bul Qazaqstan men ASEAN elderi arasyndaǵy áýe qatynastaryn jandandyrýǵa múmkindik beredi", - dedi Qazaqstan prezidenti.
Memleket basshysy aýyl sharýashylyǵy salasyndaǵy yntymaqtastyqtyń mańyzy zor ekenine nazar aýdardy. Singapýr kompaniialaryna birlesken agroinnovatsiialyq ortalyqtar qurý, dáldigi joǵary eginshilik jáne sý resýrstaryn barynsha tiimdi paidalaný baǵyttarynda birlese jumys isteý usynyldy.
Forým aiaqtalǵannan keiin memleket basshysy Qasym-Jomart Toqaevtyń jáne Singapýr Respýblikasy premer-ministriniń orynbasary – ekonomikalyq saiasat jónindegi úilestirýshi ministr Heng Sýi Keattyń qatysýymen kommertsiialyq qujattarǵa qol qoiý rásimi ótti.
Sýret: Aqorda
Mynadai qujattarǵa qol qoiyldy:
1. "Qazposhta" AQ men SingPost arasyndaǵy Strategiialyq yntymaqtastyq týraly kelisim;
2. "KTZ Express" AQ men Global DTC arasyndaǵy Tsifrlyq dálizdi iske qosý týraly deklaratsiia;
3. "Qazaqstan temir joly" UK" AQ, PSA KZ Pte Ltd, KPMC Ltd jáne G-trans Service arasyndaǵy Yntymaqtastyqty odan ári damytý týraly memorandým. Budan bólek, biznes forým aiasynda mynadai qujattarǵa qol qoiyldy: 1. Forebright Capital Asia Private Limited, "Qazaqstan Investment Corporation" AQ jáne "BGI Hong Kong Tech Co., Limited" arasyndaǵy Forebright Life Science Technology Fund týraly investitsiialyq kelisim; 2. "Biriýk Altyn" JShS men AlDigi Holdings Pte. Ltd kompaniiasy arasyndaǵy kelisim; 3. Qazaqstannyń "Syrtqy saýda palatasy" JShS men Singapýrdyń óndiristik federatsiiasy arasyndaǵy Ózara túsinistik týraly memorandým;
4. "Caspian Group" AQ men China Regional Development and Planing Institute Co., Limited arasyndaǵy Ózara túsinistik jáne yntymaqtastyq týraly memorandým;
5. "Caspian Group" AQ men KPMG Samjong Accounting Corp. arasyndaǵy Ózara túsinistik týraly memorandým;
6. "Mandarin building" JShS, "Singapore International School Kazakhstan" JShS jáne Kinder World International Group arasyndaǵy Yntymaqtastyq týraly kelisim;
7. Qazaqstan Respýblikasynyń Tsifrlyq damý, innovatsiialar jáne aeroǵarysh ónerkásibi ministrligi men Nomadic Innovation Hub kompaniiasy arasyndaǵy Ózara túsinistik týraly memorandým;
8. Nomadic Innovation Hub pen Clockster arasyndaǵy investitsiialyq kelisim;
9. Nomadic Innovation Hub pen Snap hunt rekrýting platformasy arasyndaǵy investitsiialyq kelisim.
