Qazaqstanda qazan aiynda 13 modýldik juqpaly aýrýlar statsionarlaryn salý josparlanǵan. Bul týraly QR Densaýlyq saqtaý ministri Aleksei Tsoi Facebook-paraqshasynda jazdy, dep habarlaidy "Ult aqparat".
«Osy jyldyń maýsym-shildesinde koronavirýs infektsiiasy taralýynyń óte kúrdeli tájiribesi bárimizdiń esimizde. Ol kezde meditsina uiymdary patsientter tasqynyna tótep bere almai qaldy. Aldaǵy ýaqytta mundai jaǵdaiǵa jol bermeý úshin jáne kornavirýstyń oryn alýy múmkin jańa tolqynyna infektsiialyq qyzmetterdi daiyndaý maqsatynda Vedomstvoaralyq komissiia Nur-Sultan, Almaty, Shymkent qalalaryndaǵydai 2,7 myń tósek-orynǵa arnalǵan jańa 13 juqpaly aýrýlar aýrýhanasyn salý týraly sheshim qabyldady», - dedi ministr.
Onyń atap ótýinshe, mundai statsionarlar Aqmola, Almaty, Jambyl, Qaraǵandy, Qyzylorda, Soltústik Qazaqstan, Atyraý, Túrkistan, Batys Qazaqstan, Qostanai, Mańǵystaý, Pavlodar oblystarynda jáne Almaty qalasynda salynady. Qazirgi ýaqytta ákimdikter jer ýchaskesin bólip, memlekettik satyp alýlar týraly zańnamaǵa sáikes merdiger uiymdy tańdaý protsesin júrgizip jatyr. Óńir ákimdikteri statsionarǵa tapsyrys berýshi sanalady. Al aýrýhanalar «Jumyspen qamtý» jol kartasynan únemdelgen jáne jergilikti biýdjetterdiń qarajattary esebinen qarjylandyrylady. Árbir juqpaly aýrýlar aýrýhanasynyń qunyn ár ákimdik ózdiginen qalyptastyrady.
«Sonymen qatar qazirgi ýaqytta atalǵan aýrýhanalardyń shtattyq kestesin der ýaqytynda qalyptastyrý jumysy júrgizilip jatyr. Óitkeni, qazanda, qajettilik týyndaǵanda olar birden meditsinalyq kómek kórsetýi tiis»,- dedi Aleksei Tsoi.
