"13 tamyz kúni Rio-de Janeirodaǵy Olimpiada oiyndarynda qazaqstandyqtar ádettegidei birneshe sport túri boiynsha synǵa túsedi", - dep habarlaidy Ult.kz tilshisi.
Tańǵy saǵat 04:00-de «Riotsentro» kesheninde aýyr atletikadan saiystar bastalmaq. Jarys jolyna 85 kelige deiingi salmaqta sportshylar shyǵady. Ol jerde Qazaqstan namysyn tolaǵai sportyshymyz Denis Ulanov qorǵaityn bolady. 2016 jyly sáýir aiynda ol aýyr atletikadan ótken Aziia chempionatynda jeńimpaz atansa, 2015 jyldyń jeltoqsan aiynda Groznyida ótken halyqaralyq týrnirde kúmis medal enshilegen edi. Ulttyq quramada júrip, aitýly jetistikterge jetip kúlli álemge aty máshhúr bolmaǵanmen, Denis Ulanov Aleksei Nidiń jasyryp otyrǵan kózirleriniń biri bolýy ábden múmkin.
Al keshki saǵat 18:40-ta Olimpiada stadionynda jeńil atletika saiystary bastalady. Úsh attap sekirýden quramanyń maitalman sportshylarynyń biri, London Olimpiadasynyń chempiony Olga Rypakova qatysady dep kútilýde.
Sonymen qatar Olga Rypakovanyń izbasary Irina Litvinenko da osy synda baq synaidy.
20:00-de Qazaqstan jankúierleri boksshy Oljas Sáttibaevtiń ónerin tamashalai alady. Qazaqstandyq boksshy úshin bul alǵashqy Olimpiada, al onyń qarsylasy pýertorikolyq Djever Sintron Okasio London Olimpiadasynda oiqastaǵan órenniń biri jáne úlken tájiribege ie. Qai jeńgeni Rio Oiyndarynyń 1/8 finalyna joldama almaq.
Biz úshin tańsyq sport túri bar, ol - batýtta sekirý. «Jeke sekirý» saiysy 2000 jyldan bastap Olimpiada oiyndarynyń baǵdarlamasyna engizilgen. Bizdiń eldiń atynan bul synǵa shymkenttik sportshymyz Pirmammad Áliev shyǵady. Esterińizge sala keteiik, Olimpiada joldamasyn ol Rio-de-Janeiroda ótken litsenziialyq týrnirde jeńip alǵan edi. 2015 jyldan beri sportshy Amerika Qurama Shtattarynda jetekshi maman Dmitrii Poliarýshtyń qol astynda daiyndalýda. Qazirgi ýaqytta Pirmammad elimizdiń bas bapkeri Sergei Vertiankinniń jetekshiligimen qatysyp otyr. Olimpiadalyq jarys Astana ýaqytymen 23:03-te bastalady. Álievpen qatar bul dodada álemniń ózge de memleketterinen 16 sportshy qatysady.
Al 13-nen 14-ne aýǵan túni bokstan erler arasyndaǵy synda 69 kelige deiin salmaq dárejesinde Daniiar Eleýsinov óziniń shirek finaldyq jekpe-jegin ótkizedi. Bastalýy saǵat 03.30-da. Sonymen qatar, 91 kelige deiingi salmaqta Vasilii Levittiń jartylai finaldyq (03.45) jáne 91 keliden joǵary salmaqta Ivan Dychkonyń 1/8 finaldyq (04.00) jekpe-jekterin tamashalai alamyz.
Ult portaly
