Assalaýmaǵaleikým, Qazaq eli! Muhit asqan qara balańyz taǵy da sizdermen bailanysqa shyǵyp tur. Bul joly qos qorjynymdy teń ustap, qoldaý bildirgen Genadai balalaryńyzdyń erligin aitýǵa shyǵyp turmyn. Árine, bórkimizdi atyp, súiinshi suramadyń dep sókpeńizder. Jeńistiń shashýy shashylmasa da, jeńisten kem túspeitin kezdesý boldy, jeńiske bergisiz erlik kórsetken Gennadii balalaryńyzǵa riza boldym. Jat jerde júrip, eldiń namysyn qulatpaǵan uldaryńyzǵa menen góri sizder erekshe qurmet kórsetip jatqan bolarsyzdar. Álbette, solai bolýǵa tiis. Maiqudyqtyń maitalmany qandai qurmetke de laiyqty, qalai maqtasa da bolady. Sonymen, alǵashqy amandasý sózimizdi túiindep, negizgi bokstyń qalai ótkenine toqtalaiyn.
Gimn shalqyǵan kez! Ǵasyr jekpe-jegi bastalatyn ýaqyt ta jetti. Gennadii men Alvarestiń shaiqasynyń aldyndaǵy kezdesýlerge toqtalyp, sizderdiń ýaqyttaryńyzdy almaiyn. Biz de, siz de, kúlli álem kútken bokstan bir-aq bastaiyn.
Sonymen, eki myqtynyń judyryqtasýy bastalmas buryn, eki eldiń memlekettik Gimni shyrqaldy. Qudai-aý, qandai ǵajap deseńizshi?! Táýelsiz Qazaq eliniń Gimni muhittyń arǵy betinen shyrqalǵany. Buǵan deiin de talai dúbirli doda da Kók bairaǵymyz qalyqtap, án uranymyz shyrqaldy emes pe. Al, búgingi Gimin múlde erekshe desem artyq aitpaǵanym. Talantymen talaidy tańǵaldyryp júrgen Gennadii Golovkinniń qurmetine oryndalǵan Gimnniń «T*mobile» keshenniń ishin tamasha bir kúige bólegendei áser qaldyrdy. Kóńil tolqytatyn Gimnniń daýysyn estigen bizdiń kózimizge ystyq jas irkilgendei áser qaldyrdy. Qazaqtyń shapanyn kiip, ortaǵa symdai tartylǵan qazaqtyń symbatty jigiti shyǵyp urandaǵanda tóbemiz bir eli kókke jetkendei boldyq. Ár tustan, kók kiimdi kigen qazaq jankúierleriniń de daýysy shyǵyp, eliniń Gimnin qosyla shyrqaǵanyn jiyrma myń jankúierdiń ishinen estip te turdym. Bul biz úshin qýanyshty jait. Shirkin, sońǵy raýndtan keiin dál osylai shyrqalyp jatsa degen tilegimizdi ishtei qaitalap turdyq. Sonymen eki memlekettiń Gimni oryndalyp, sońynan álemge aty áigili Maikl Baferdiń daýysy sańq ete qaldy. Ortaǵa boksshylardy shaqyrdy. Sharshy alańǵa jetkenshe ataq-dańtaryn tanystyryp, qos myqtynyń esimderi aityldy. Qazaqtyń oiýly shapanyn jamylyp, Gennadii Golovkin men qoldaýshylary shubyrtyp, Saýl Alvareste jetti. Sharshy alańnyń ár qaptalyna baryp, oinaqshyp júrgen Saýl jankúierlerine qurmet kórsetip júr. Tyǵyrshyqtai jumyr denesimen babynda ekeni alystan-aq baiqalady. Bizdiń Gena da qalysar emes. Onyń da jaqtaýshylary jeterlik. Elden kelgen jankúierlerdi qospaǵanda Genany jaqsy kóretin ózge de jankúierler esimin aiǵailap, dýyldatyp qoia berdi.
1-raýnd. Gena ádettegidei qarsylasyn tyqsyrtyp sharshy alańda qýyp júr. Aitarlyqtai joiqyn soqqy jumsamasa da, djep soqqylaryn baǵyttap saq qimyldaýda. Alvareste birden berile qoiatyn osaldar sanatynan emes ekeni anyq. Genanyń soqysynan sytylyp shyǵyp, tigizetin emes. Áitse de, bizdiń jigittiń úsh soqqysy Saýldiń betine tidi. Meksikalyq jigitte qarap qalmady. Raýndtyń sońyna qarai ol da qarymta qaitaryp, bir-eki soqqysyn darytyp úlgerdi. Jalpy, birinshi raýnd barlaýmen bolatynyn eskersek, eki boksshy da sol úrdisten taiqymady jáne óte saq qimyldady. Kóbine qorǵanysqa kóńil bólip, bir-biriniń soqqysyna túsip qalmaýdy oilady. Meniń oiymsha birinshi raýnd teń dárejede ótti jáne solai dep baǵa beremin.
2-raýnd. Nege ekeni belgisiz Genanyń qarqyny báseńdeý. Buǵan deiin bolǵan kezdesýlerinde qarsylastaryn tómpeshtep alatyn Gena bul joly ondai qadamǵa barmady. Kersinshe, Alvares qaýipti soqqylarymen shabýyldap, bir-eki soqqysyn da ótkizip úlgerdi. Al otandasymyz bolsa, kóbirek qorǵanysqa kóńil bólýde. Tipti barǵan saiyn meksikalyq boksshy qarqyn alyp bara jatqandai. Júregimiz aýzymyzǵa tyǵylyp, qarsy soqqyǵa tap kelip qalmasa eken dep tilep otyrmyz. Á, mine, ekinshi raýnd ta aiaqtaldy. Qaýipti sátten amanbyz. Shamamen teń aiaqtaldy dep esepteimin.
3-raýnd. Taqym qysyp, janymdy shúberekke túiip otyrmyn. Gena bul joly tym sylbyr. Qorǵanysy da syr berip jatyr. Alvarestiń birneshe aýyr soqqysy ótip ketti. Qudai ońdaǵanda qulap qalýdan amanbyz. Osy ýaqytta qarsylasyn sharshy alańda bir aýnatyp alatyn Genanyń burynǵydai qarqynyn baiqai almai otyrmyn. Kersinshe qarqynyna-qarqyn qosqan Alvares basymdyq tanytýda. Oń qolymen baǵyttaǵan soqqylary qorǵanysty buzyp jatqandai kórinedi. Qalai bolǵanda da jastyń aty jas, aiaǵymen de shiraq qimyldap, judyryǵyn da jyldam jumsap, upai enshileýde. Keibir soqqylaryna tipti kóz ilespei, qai jerinen sart ete qalǵanyn da baiqai almaýdamyz. Óitkeni óte jyldam, tym shapshań. Boksshy úshin eń kerektisi de osy shyǵar. Ashyq tusty tez baiqap, sart etkizý. Sonymen úshinshi raýndta aiaqtaldy. Bul joly bir basy basym bolsa da, Alvarestiń qanjyǵasynda ketti dep oilaimyn.
4-Raýnd. Meniń kózim ózine-ózi senbei otyr. Buǵan deiin qarsylasyna jarq etip tietin Genanyń soqqysyn izdeitindei. Baiaǵy kombinatsiia, shapshańdyq, ógizdi qulatatyn joiqyn soqqynyń barlyǵy tórtinshi raýndta joq. Alvares bolsa ústi-ústine tópeletip soqqylap júr. Gena tek qorǵanýda. Qorǵanystyń ózi kóńilge medet degenimiz bolmasa, aragidik buzylyp qalyp, qarsy soqqylardy betine tigizip alýda. Kei tustar da Saýldiń baýyr tustan jumsalǵan judyryǵy Genany teńseltip jiberedi. Qýanyshqa orai qulap qalmai, sharshy alańda júr. Árine, meni Saýlǵa jaqtasyp otyr deýlerińiz múmkin. Biraq myna boks men úshin qiynǵa soǵýda. Dál osy kezdesýdi Genanyń enshisine jazyp jatsa, onda men sizderden keshirim suraimyn. Dál qazirgi raýnd Saýldiń basymdyǵy baiqalady. Sport bolǵasyn naqty aqparat pen shyndyqty aitý kerek. Áitpese, sonaý qazaq aýylynan Genaǵa jaqtaspaǵanda Meksikanyń sary shegiriniń shash baýyn kóterip keldi deisizder me. Saýl dál soqqan soqqylarymen kimdi bolsa da eriksiz óziniń jetegine ertip ketetindei. Sonymen bul raýndty da men Saýlǵa bergendi jón sanap otyrmyn. Árine, bokstyń taǵdyryn sheshetin, jeńisti anyqtaityn men emes. Men tek, ózderińiz sekildi jankúiermin, eki myqtynyń arasyndaǵy shaiqas jaily aqparat taratýǵa elden kelgen jalǵyz jýrnalispin. Al, upaidy esepteý tóreshilerdiń enshisinde.
5-raýnd. Bul raýndta Genanyń enshisine jazýǵa bolady. Saýldi buryshqa tyǵyp alyp sabady. Soqqylary da darydy. Osy tusta aita keteiin, Gena ádette buryshqa tyǵyp qarsylasyn sabaǵan tusta, birneshe seriialy soqqy jumsap, ásirese baýyr tustan soǵatyn ádemi bir soqqylary bar edi. Bul joly ony biz baiqai almai otyrmyz. Arasynda sol ádisine salyp qoiady. Degenmen, álsiz. Tipti Saýliń oiyn kórip júrgendei. Genanyń soqqylary tiip jatsa, basyn shaiqap, bar bolǵany osy ma, maǵan esh áser etpedi degendei ishara tanytyp júr.
6-raýnd. Gennadii óziniń babyna endi kele jatqandai. Shiyrshyq atyp, atoilap shapty. Birneshe seriialy soqqylaryn jumsap, Saýldi ábigerge túsirdi. Ógiz qulatatyn bir-eki soqqysy dál tidi. Biraq, Saýl da myqty eken. Qatty tise de tizerlegen joq.
7-raýnd. Bul raýndty da Genaǵa beremin. Saýldiń aldyndaǵy batyrlyǵy báseńdep qalǵandai. Júzinde bir qorqynysh paida boldy. Bir qaraǵanda sharshap ta qalǵandai. Kezdesýdiń sońyna qarai Gennadii jigerlene bastap, óziniń mánerine kóshti. Árine, Saýldiń saǵy múldem synyp ketti deýge kelmeidi. Kezdesýdiń taǵdyry bul raýndpen sheshilip ketpesi anyq. Alda áli raýndtar bar. Ol da jaqsy babyn da, ábden tolyqsyǵan ýaqyty. Onyń ústine Genany óte jiti zerttep, tyńǵylyqty daiyndalǵany kórinip tur.
8-raýnd. Ómir degen alma-kezek emes pe. Bul raýndtyń basyn Saýl belsendilikpen bastady. Az da bolsa tynyǵyp alǵasyn ba, alǵashqy jumsaǵan judyryqtary Genaǵa ótip ketti. Biraq, bizdiń Gena da judyryqqa-judyryqpen jaýap qaityp, osaldyq tanytpady. Ásirese alys qashyqtyqtan jasaǵan djepteri dál tiip jatty. Taktikaǵa da kóńil bólip, jaqyn shaiqasqa barmai, qarymta qaitaryp, umtylǵan tusta jaqsy kútip aldy. Bul Genanyń burynǵy ádisteriniń biri bolatyn. Gena raýndttyń sońǵy sekýndtaryn jaqsy aiaqtap, joiqyn bolmasa da, dál baǵyttaǵan judyryǵy dittegen jerine tidi.
9-raýnd. Bul raýnd ta óte qyzyqty boldy. Shym-shytyryq soqqylardy jumsap, bir-birin tómpeshtei jóneldi. Genanyń búrkitshe búrip alatyn kezi osy raýndta oryn aldy. Anaý jigit te tabany jerge jelimdelip qalǵan ba, aýyr soqqyny qansha qabyldasa da qulamai qaldy. Onyń ústine kóptegen mamandar men jankúierler Gena Alvaresti osy toǵyzynshy raýndta qulatady degen pikirler bolǵan. Sol aitqandary dál kelmese de, sál ǵana qaldy jáne rasynda da osy raýndta Gena atoi saldy.
10-raýnd. Kezdesýdiń kómbesi kóringen saiyn boksshylar qarqyn alyp keledi. Tipti osy raýndta bir birine baǵyttaǵan soqqylaryn men qabyldaǵandai boldym. Eseńgirep, miym aýyp qalǵandai kúi keshtim. Shym-shytyryq jumsalǵan judyryqqa kóz ilespeidi. Bir-birine aýyr soqqylarmen jaýap qaitaryp, beriletin emes. Qai jeńgeniń meniki degendei, soqqylar dál tise aiyzy qanǵan jankúierler ornynan bir turyp otyr. Men de Genajan, keziń keldi, ur, ura tús, seniń qolyńnan keledi, talai myqtynyń jigerin qum ettiń emes pe degen sózdi ishtei kúbirlei jóneldim. Biraq, eki myqty da bir-birin qulata almady. Menińshe, bul raýnd teń aiaqtaldy desem, eshkim daýlasa qoimas. Alda naǵyz chempiondardyń raýndty kútip tur jáne ol da bastaldy.
11-raýnd. Biz kútken shaiqas bul joly bolmady. Eki boksshymyz da sharshap qalǵandai kórindi. Kim biledi, múmkin, kúshterin sońǵy raýndqa saqtap júr me, áiteýir, asa tartysty bolmady. Joiqyn soqqylar jumsamady. Bir sózben aitqanda teń dárejede ótkizdi.
12-raýnd. Qushaqtasýdan bastalǵan raýnd sartyldaǵan soqylarmen jalǵasyp ketti. Gong berilgen bette Saýl birneshe aýyr soqqylardy baǵyttap úlgerdi. Dál osy tusta, júregimiz aýzymyzǵa tyǵylyp Gena, shyda, qulama, sen de soq dep taqym qystyq. Myqtyny – myqty deý kerek. Talai shaiqasta ysylǵan Gennadii soqqysyna soqqymen jaýap berip, ashyq aiqasqa shyqty. Naǵyz chempiondardyń shaiqasy endi bastalǵandai. Jankúierler de dýyldap qoia berdi. Bul raýnd kóp nárseni sheshedi. Tóreshilerdiń buǵan deiingi raýndta qandai baǵa bergenin bilmeimin. Biraq, sońǵy raýnd chempiondyqtyń taǵdyry sheshiletin kez. Munda soqqy men qosa, belsendilik, dáldik esepteletinin esten shyǵarmaýymyz kerek. Ony menen góri boksshylar jaqsy biledi. Soǵan qarai ekeýi de tynbai qol sermep jatyr. Mine, 12 raýndtyń bitýine 40 sekýnd qaldy. Gena da qarqynǵa basty. Soqqylap jatyr. Saýlda qalysar emes. Dáldik jaǵynan Genanyń basymdyǵy baiqalady. Iá, mine, 5 sekýnd, 4 sekýnd, 3 sekýnd, 2 sekýnd bitti. Ái, jaraisyń! Jasyń 35-ke kelgende jap-jas Meksikanyń qabylanymen arystansha aiqastyń. Shyn shaiqasty kórsettiń. Ol seniń myqtylyǵyń. Sońǵy sekýnqa deiin soqqylaryńdy qarsha borattyń. Menińshe tóreshiler teń dep shesher. Áitse de, bir soqqy bolsa da Genanyń enshisine jazylý kerek, bul raýnd. Biraq, sońǵy tolyq sheshimdi tosaiyq.
TÚIIN:
Uly shaiqastyń sheshýshi kezi de kelip jetti. Men buǵan deiingi reportajdarymda aitqan bolatynmyn. Eger eki boksshy teń túsip jatsa tańǵalmańyzdar dep. Ekeýi de naǵyz batyrǵa laiyq boks keshin syilady. Iá, tóreshi kimniń qolyn kóteredi. Habarlaý bastaldy. Áp, bárekeldi! Ekeýi teń tústi, teń sheshim shyǵardy. Mine, meniń aitqanym dál keldi. Árine, buǵan biz qýanýymyz kerek. Jeńilis joq, alda áli shaiqas bar. Qýanyshymyzǵa orai bizdiń Gennadii óziniń chempiondyq ataǵyn qorǵap qaldy. Basymyz jerge qaraǵan joq. Táýbe, eńsemiz tik. Laiym solai bolǵai! Meksikalyq sary shegir qarymta qaitaram deidi. Oǵan bizdiń myqty da tastúiin daiynmyn dep jatyr. Naǵyz chempion sol kezde anyqtalar. Múmkin, úshinshi kezdesýde... Qalai bolsa da, alda áli shaiqas bar ekenin kókeige túrtip alaiyq. Bul joly nege anyqtalmady degenge kelsek, onyń birneshe sebebi bar. Ony men kelesi jazbama qaldyraiyn. Gena men Saýldiń shaiqasyndai chempiondyqty jumbaq kúiinde qaldyrǵandai tamsandyryp qana aiaqtaiyn. Al, aǵaiyn, men osymen Las-Vegastaǵy reportajymdy ýaqytsha doǵaraiyn. Elge barǵasyn ýáde etken sebepterdi jazatyn bolamyn. Amandyqta júzdeskenshe!
Nesip JÚNISBAIULY. AQSh, Las-Vegas.
