Aǵymdaǵy jyldyń 5 qyrkúiegine deiin 2,9 mlrd. teńgege jýyq qaryzdyń negizgi somasyn tólegen 114 849 jeke tulǵalardyń 688,3 million teńge kóleminde ósimpuly esepten shyǵaryldy.
Atalmysh shara Qazaqstan Respýblikasynyń Prezidenti Qasym-Jomart Toqaev 26 maýsymdaǵy «Qazaqstan Respýblikasy azamattarynyń borysh júktemesin azaitý sharalary týraly» Jarlyǵyna sáikes júzege asyryldy, dep habarlaidy "Ult aqparat" QR Memlekettik kirister komitetiniń málimetterine silteme jasap.
Memlekettik kirister komitetiniń deregi boiynsha, qazirge ýaqytta 1,4 millionǵa jýyq adam raqymshylyqqa iligip, 13,9 milliard teńge kólemindegi qaryzdyń negizgi somasyn tólegen jaǵdaida, 6,3 milliard teńge kóleminde ósimpul esepten shyǵarylady.
«Úkimettiń halyqtyń jaǵdaiyn jasap, qaryzyn azaitý maqsatynda jasap jatqan raqymshylyǵy az emes. Máselen, 2019 jyldyń sońyna deiin shaǵyn jáne orta biznes ókilderiniń 210 milliard teńge negizgi bereshegin tólegen jaǵdaida 123 milliard ósimpulyn, 7 milliardqa jýyq aiyppulyn keshirse, qarapaiym halyqtyń múlik, jer jáne kólik quraldary salyǵyna 14 milliardqa jýyq negizgi bereshegin tólegen jaǵdaida 6 milliardtan astam ósimpulyn keshiredi. Osyndai qomaqty somany keshirim jasaýdyń ózi halyqqa jasalǵan úlken qamqorlyq. Osy múmkindikti paidalanyp qalý kerek» dedi QR QM MKK Jurtshylyqpen bailanys basqarmasynyń basshysy Oljas Otar.
Salyq qaryzyn memlekettik kirister komitetiniń www.kgd.gov.kz resmi saitynda «Salyq qaryzynyń bolýy/bolmaýy týraly aqparat» bóliminde tekserýge bolady. Salyq tóleýshi óziniń JSN-n engizse boldy, óziniń salyqtyq qaryzy týraly málimetterdi ala alady.
