QR Bilim jáne ǵylym ministrligi Balalardyń quqyqtaryn qorǵaý komiteti Almatyda 11-qabattan sekirip ketken oqýshyǵa qatysty oqiǵaǵa túsinik berdi, dep habarlaidy QazAqparat.
«Almaty qalasyndaǵy Nazarbaev Ziiatkerlik mektebinde qaiǵyly jaǵdaida qaza tapqan 8-synyp oqýshysynyń ata-analary men jaqyndaryna qaiǵylaryna ortaqtasyp, kóńil aitamyz.
Qazirgi ýaqytta áleýmettik jelilerde oqýshynyń qaitys bolýyna bailanysty qarama-qaishy aqparat tarap jatyr.
QR BǴM Balalardyń quqyqtaryn qorǵaý komitetiniń ókilderi qaza tapqan oqýshynyń ata-anasymen bailanysta.
Quqyq qorǵaý organdarynyń qyzmetkerleri tergeý is-sharalaryn júrgizýde.
Tergeý múddesi úshin jaǵdaidyń egjei-tegjeii jariia etilmeidi», - delingen komitet habarlamasynda.
Málim etilgendei, tergeý nátijeleri boiynsha qajetti sharalar qabyldanatyn bolady. Tergeý amaldarynan keiingi resmi qorytyndyny kútý qajet.
«Ata-analardy, muǵalimder men mektep basshylaryn balalarmen qarym-qatynasta asqan meiirimdilik tanytýǵa shaqyramyz. Óitkeni balalarymyzdyń ómiri men densaýlyǵy qoǵamnyń basty qundylyǵy bolyp tabylady», - dedi QR BǴM Balalardyń quqyqtaryn qorǵaý komitetinen.
Eske salaiyq, oqiǵa 28 qazanda boldy. Almaty qalasy himiia-biologiia baǵytyndaǵy Nazarbaev Ziiatkerlik mektebi ákimshiliginiń málimetinshe, oqýshy sabaqtan tys ýaqytta qaza boldy. «Qazirgi ýaqytta tergeý amaldary júrgizilýde. Kámeletke tolmaǵan balanyń jáne bastalǵan tergeýdiń múddesi úshin mektep qosymsha aqparatty bere almaidy», - dep habarlady bilim mekemesinen.
Almaty qalalyq Politsiia departamenti atalǵan fakti QR Qylmystyq kodeksiniń 105-baby boiynsha Bostandyq aýdandyq politsiia bóliminde sotqa deiingi tergep-tekserýdiń biryńǵai tizilimine tirkelgenin málim etti. «Oqiǵanyń sebepteri men mán-jaiy óndiris barysynda anyqtalady. Sot-meditsinalyq saraptama taǵaiyndaldy», - dedi politsiiadan.
