2021 jyldyń 11 aiynda memlekettik biýdjetke 10 trln 179 mlrd teńge somasynda kiris tústi. Bul týraly búgin Úkimet otyrysynda QR Qarjy ministri Erulan Jamaýbaev aitty, dep habarlaidy QazAqparat.
«Memlekettik biýdjetke 10 trln 179 mlrd teńge somasynda kiris tústi nemese jospar 103,6 paiyzǵa atqaryldy. Respýblikalyq biýdjetke 6,7 trln teńge tústi nemese jospar 101,7 paiyzǵa oryndaldy. Jalpy kiris jospary 109 mlrd teńgege asyra oryndaldy. Onyń ishinde salyqtar - 51 mlrd teńgege, salyqtyq emes túsimder - 54 mlrd teńgege. Salyqtar boiynsha asyra oryndaýdyń negizgi somalary korporativtik tabys salyǵyna, shiki munaiǵa eksporttyq kedendik bajǵa jáne paidaly qazbalardy óndirýge salynatyn salyqqa tiesili», - dedi ministr.
Onyń aitýynsha, korporativtik tabys salyǵy boiynsha jospardyń asyra oryndalýy 686 iri salyq tóleýshi boiynsha málimdelgen avanstyq tólemder somasynyń 73,2 paiyzǵa ulǵaiýyna bailanysty boldy. Shiki munaiǵa salynatyn eksporttyq kedendik bajy boiynsha jospardyń asyra oryndalýyna osy jylǵy 11 aida munai baǵasynyń ortasha eseppen 48,7 paiyzǵa qymbattaýy áser etti. Paidaly qazbalardy óndirýge salynatyn salyq boiynsha jospardy asyra oryndaýǵa 2020 jyldyń uqsas kezeńimen salystyrǵanda osy jylǵy 11 aida negizgi eksporttyq pozitsiialarǵa baǵanyń ortasha eseppen 27 paiyzǵa ósýi yqpal etti.
«Salyqtyq emes túsimder boiynsha jospardy asyra oryndaý negizinen memlekettik menshiktegi aktsiialardyń memlekettik paketterine dividendter jáne memlekettik mekemeler salatyn aiyppuldar, ósimpuldar, sanktsiialar, óndirip alýlar esebinen qamtamasyz etildi», - dedi ol.
Ministrdiń dereginshe, ishki óndiris taýarlaryna salynatyn qosylǵan qun salyǵy boiynsha jospar oryndalmady. Ishki óndiris taýarlaryna qosylǵan qun salyǵy boiynsha jospardyń oryndalmaýy ótken jyldyń uqsas kezeńimen salystyrǵanda osy jylǵy 11 aida qosylǵan qun salyǵyn qaitarý somasynyń 340 mlrd teńgege nemese 62 paiyzǵa ulǵaiýyna bailanysty bolady.
«Jergilikti biýdjetterdiń kiristeri 107,5 paiyzǵa atqaryldy jáne 3,5 trln teńgeni qurady. Jospar 243 mlrd teńgege, onyń ishinde salyq boiynsha 202 mlrd teńgege asyra oryndaldy. Josparlar negizgi salyqtardyń barlyq túrleri boiynsha asyra atqaryldy», - dedi Erulan Jamaýbaev.
