Osy jyldyń 11 aiynda 157 mlrd teńgeniń qarjylyq buzýshylyqtar anyqtaldy. Bul týraly Úkimet otyrysynda QR Qarjy ministri Erulan Jamaýbaev aitty, dep habarlaidy QazAqparat.
«Kameraldyq baqylaýmen osy jylǵy 11 aidyń ishinde 11,3 trln teńgege 897 myńǵa jýyq memlekettik satyp alý rásimi qamtyldy. Tekserý qorytyndylary boiynsha 36,8 myń rásim boiynsha buzýshylyqtar anyqtaldy. Onyń ishinde memlekettik aýdit nysandary buzýshylyqtardy joiý týraly habarlamalardyń 97 paiyzyn oryndady», - dedi ministr.
Onyń dereginshe, 2 996 aýditorlyq is-shara ótkizildi. Aýditpen 1 trln 848 mlrd teńge biýdjet qarajaty qamtyldy. 157 mlrd teńge somasyna qarjylyq buzýshylyqtar anyqtaldy.
«Taýarlardy jetkizýmen, qyzmetterdi kórsetýmen jáne jumystardy oryndaýmen qalpyna keltirý, biýdjetke óteý jáne esepte kórsetý jolymen 127 mlrd teńgege buzýshylyqtar joiyldy. Aýdit nysandary qyzmetin jetildirý jáne tiimdiligin arttyrý úshin 2,6 myń usynym berildi», - dedi Erulan Jamaýbaev.
