Elimizdiń «100 jańa esimin» irikteý jónindegi jumys komissiiasy jobanyń ekinshi kezeńi bastalǵanyn jáne jańa baiqaýdyń buǵan deiingisinen erekshelikterin aityp berdi, dep habarlaidy QazAqparat tilshisi.
«Bul kezeńde ótinimderdi jinaý ǵana aiaqtalyp, al irikteý kelesi satyda júrgiziletin bolady. Mine sol ýaqytta biz tizimdi qalyptastyra bastaimyz. Negizgi ereksheligi mynada, eger ótken jyly adamdar ótinimderdi ózderi bere alsa, bul jyly ótinimder úkimettik emes uiymdar arqyly beriletin bolady», - dedi «Qazaqstan jastarynyń kongresi» zańdy tulǵalar birlestiginiń atqarýshy direktory Toqtar Bolysov QazAqparat tilshisimen áńgimelesýi barysynda.
Onyń aitýynsha, elimizde qyzmettiń san alýan túrimen ainalysatyn myńdaǵan úkimettik emes uiym bar. «Eger ol biznesmen bolsa, onda biznes qoǵamdastyq arqyly, eger ol jas belsendi bolsa, onda kez kelgen jastar uiymy arqyly ótinim bere alady. Kandidat jeńiske jetip, «100 jańa esim» tizimine engen jaǵdaida uiym ony odan ary ilgeriletýmen ainalysady. Bul joba jeńimpazy úshin qosymsha piar bolmaq», - dedi ol.
Toqtar Bolysovtyń paiymynsha, jobaǵa engizilgen mundai jańalyq barynsha laiyqty kandidatty tańdaýǵa mol paida ákeledi. «Meniń oiymsha, bul barynsha sapaly irikteý júrgizý úshin qajet. Óitkeni, elimizde bes jyldan astam ýaqyt boiy jumys istep kele jatqan qoǵamdyq uiymdar azamattardyń qaisysynyń barynsha belsendi azamattyq ustanymy bar ekenin biledi. Sonymen qatar bul úkimettik emes uiymdardy belsendi bola túsýge yntalandyryp, olardyń Qazaqstandaǵy tanymaldyǵyn arttyrady dep oilaimyn», - dedi komissiia ókili.
Ókinishke orai ol qazirgi ýaqytta qandai kandiattar usynylǵanyn aita almady. Sebebi jumys toby kandidattardyń tizimin tolyq alǵan joq. Degenmen, olardyń arasynda elimizge tanymal azamattardyń bolmaityndyǵy anyq. «Tizimdi bizge sál keiinirek beredi. Medialyq tulǵalarǵa qatysty aitar bolsa, onda bul jobany «100 jańa esim» dep bekerden beker atamaidy. Soǵan sai ázirshe tanymal emes, biraq elimizdiń nemese naqty bir óńirdiń damýyna úlken úles qosqan tulǵalar bolady. Ótken jyly ózderińiz de ártister ne bolmasa halyqtyń aýyzynda júrgen ózge de tanymal esimderdiń qatyspaǵandyǵyna kóz jetkizý múmkindigine ie bolǵan edińizder. Joba búginde tanymal bolǵan tulǵalardy nasihattaýǵa emes jańa esimderdi tanytýǵa baǵyttalǵan», - dedi Toqtar Bolysov.
Onyń aitýynsha, ótken jyly negizgi tizimge engen adamdar da óz kandidatýralaryn usyna alady. «Naqty ólshemsharttary qazirgi ýaqytta bekitý satysynda tur. Degenmen, negizgisi - bul kandidattyń Qazaqstannyń damýyna qosqan úlesi. Qosymsha ólshemsharttar sál keiirek jumys keńesinde jariialanatyn bolady», - dedi ol.
Sonymen qatar «Qazaqstan jastarynyń kongresi» ZTB-nyń atqarýshy direktory jobanyń jańa kezeńinen ne kútetindigin aityp berdi. «Jastar uiymynyń jetekshisi bolǵannan keiin ótken jyly tizimge engen jastar jaiynda ǵana pikir bildire alamyn. Olar búkil elimizdiń jastary aldynda sóz sóileý múmkindigine ie boldy. Sol arqyly olardy ózderin odan ary damytýǵa yntalandyrdy desek atyq aitqandyq emes. Jastardyń qulshynystary oiana bastaǵanyna kýá boldym. Bul jastar úshin úlken yntalandyrýshy kúsh sanalady. Buǵan qosa, joba úlken bailanystarsyz nemese aqshasyz da zor tabysqa qol jetkizýge bolatyndyǵyn dáleldeidi»,- dedi Toqtar Bolysov.
Esterińizge sala ketsek, «Qazaqstannyń 100 jańa esimi» jobasynyń ekinshi kezeńine ótinimder qabyldaý 7 tamyz kúni bastalǵan bolatyn.
