Aqtóbede júz teńgeden úlken daý shyqty. Zeinetker avtobýsqa aqy tólemediń dep kondýktor urǵanyn aityp, politsiiaǵa aryzdanǵan, - dep habarlaidy Tengrinews.kz agenttigi "Astana" telearnasyna silteme jasap.
Telearna málimetinshe, elý bes jastaǵy Raihan Mamilina 29 baǵyttaǵy avtobýsqa tańerteń mingen. Artqy esikten túsetin ýaqytta kartasynda aqshasy bitkenin baiqap, kondýktorǵa zeinetkerlik kitapshasyn kórsetip elý teńge beripti. Biraq kondýktor jolaqysynyń tolyq qunyn tóleýdi talap etip, avtobýstan túsirmei qoiǵan.
"Zeinetkerlerge 40 teńge. Ol áiel meni julqylap, urǵylap avtobýstyń aldyna qarai súiredi. "Ishke kiresiń de 150 teńge tóleisiń!" dep urysyp, kiimimdi jyrtyp tastady. Qoldarym kógerip ketti", - deidi jábirlenýshi Raihan Mamilina.
Raihan avtobýstan túsken boida politsiiaǵa aryzdanǵan. Dárigerge qaralyp, ústindegi kógergen jerlerin kórsetipti. Jábir kórgen turǵyn kondýktordyń jazalanýyn talap etip otyr. Biraq basy daýǵa qalǵan kondýktor Raihan Qudabaeva da óz quqyn qorǵamaq. Ol da politsiiaǵa qarsy aryzdanypty.
"Zeinetkerlik kók kitapshany kórsetip elý teńge berdi. Men olai bolmaitynyn aittym. "Men kúnde osylai júremin, eshteńe tólemeimin" dep qashyp bara jatqan soń, qolynan ustap toqtattym. Sabaǵan joqpyn. Iterip avtobýsqa kirgizbek boldym, ol qarsylasyp, meni iterdi", - deidi kondýktor Raihan Qudabaeva.
Zeinetkerler kartamen esepteskende jolaqysy qyryq teńge eken. Biraq qolma qol aqshamen tólegende zeinetker de 150 teńge tóleýi tiis . Sondyqtan da bolar "Avtopark" basshylyǵy óz qyzmetkerleriniń buryn mundai teris qylyǵyn kórmedik dep aqtap otyr. Tek sógis jariialap, túsinikteme alypty.
"Qazirgi tańda kondýktor da óziniń quqyǵyn qorǵaý maqsatynda aryz jazyp otyr. Soǵan bailanysty ázirge eskertýmen kondýktordy da, júrgizshini de jumysqa qostyq. Quzyrly organdardyń tergeý amaldary nátijesine sáikes biz ári qarai qosymsha shara qoldanamyz", - dedi "Avtopark" JShS direktory Aqarys Tileýlesov.
Qazir bul oqiǵaǵa qatysty politseiler ákimshilik is qozǵaǵan. Eki tarap ta bir-birine dene jaraqatyn salǵandyqtan sot-meditsinalyq saraptama taǵaiyndalǵan.
