10 jastaǵy almatylyq qyz Sofi Manasian Nickelodeon komandasyna Lip Sync Battle Shorties balalar shoýyna qatysý múmkindigi úshin alǵys aitty. Aita ketý kerek, búkilálemge taraityn shoý AQSh-ta efirge juma kúni shyǵady.
Búldirshin Instagramdaǵy óz paraqshasynda telearna tobyna alǵys bildirdi.
«Nickelodeon komandasyna kásibi biliktiligi úshin alǵys bildiremin. Sonymen qatar, ár eldiń balalaryna ulty men tili, dinine qaramastan osy shoýǵa qatysyp, juldyzdai jarqyraýǵa múmkindik bergeni úshin myń rahmet!», - dedi jas juldyz.
Osylaisha Sofi álemdegi eń tanymal balalar men jasóspirimder shoýyna qatysqanyna qýanyshty ekenin jetkizdi.
«Jaqynda Nickelodeon arnasynda! Kóńildi bolady! Meniń anam sonda túsýim úshin qolynan kelgenin jasady. Maǵan ol úshin til úirený qajet edi. Bul esten shyqpaityn tájiribe boldy. Amerikalyqtar úshin meniń aktsentim sezilip turdy. Men áli de kóp ázil men qaljyńdardy túsine bermeimin. Úirenip alsam, budan da úlken biikterge jetemin! Nickelodeon arnasyn kórińizder», - dedi ol.
Munyń aldynda S.Manasiannyń anasy onyń Lip Sync Battle Shorties balalar shoýyna qatysatynyn aitqan bolatyn. Bul shoý jergilikti ýaqytpen AQSh-ta juma kúni keshki 19:00-de kórsetiledi.
Qazaqstandyqtar shoýdy 12-qańtarda 09:00-de kóre alady.
Aita ketý kerek, 10 jasar almatylyq qyzdyń Nickelodeon arnasyndaǵy shoýlarǵa kastingten ótkeni týraly tamyzda belgili bolǵan edi.
Lip Sync Battle Shorties -balalar men jasóspirimderge arnalǵan amerikalyq shoý-baǵdarlama. Eń alǵashqy shyǵarylymy 2016 jyly 11 jeltoqsanda shyqqan edi.
