13 myńnan astam 18-27 jas aralyǵyndaǵy merzimdi qyzmettegi áskeri qyzmetshi kóktemgi shaqyrý kezinde elimizdiń Qarýly Kúshteriniń, basqa da áskerleri men áskeri quralymdarynyń qataryn tolyqtyrady. Bul týraly Ortalyq kommýnikatsiialar qyzmetindegi baspasóz máslihatynda aityldy, dep habarlaidy QazAqparat.
Qorǵanys vedomstvosy áskerge shaqyrýdy aǵymdaǵy jyldyń birinshi shildesinde aiaqtaýdy josparlap otyr. QR Qarýly Kúshteri Bas shtaby Uiymdastyrý-jumyldyrý jumystary departamentiniń bastyǵy, polkovnik Sáken Júsipov koronavirýs infektsiiasynyń taralý qaýpine bailanysty qorǵanys vedomstvosy qabyldap jatqan aldyn alý sharalary týraly habardar etti.
Sondai-aq, ol áskerge shaqyrylýshylardan eki ret, iaǵni áskerge shaqyrý kezinde jáne áskeri bólimderge kelgen kezde qurama pýnktterde PTR-taldama alynatynyn aitty.
«Jańa shaqyrylýshylarǵa ekpe júrgizý qyzmet ótkerý oryndarynda uiymdastyrylady. Biyl shaqyrylýǵa jatatyn azamattardy habardar etýdiń jańa tásili qoldanylatyn bolady», - deidi Sáken Júsipov.
Pandemiia jaǵdaiynda qarym-qatynasty azaitý úshin tsifrlyq damý jáne aeroǵarysh ónerkásibi ministrliginiń 1414 servis qyzmeti pilottyq rejimde SMS- habarlamalar jiberedi.
Uiymdastyrý-jumyldyrý jumysy Departamentiniń bastyǵy áskeri qyzmet – bul árbir jastyń konstitýtsiialyq mindeti ekenin, al ony ótýden jaltarý qylmystyq jáne ákimshilik jaýapkershilikti kózdeitinin eske saldy.
«Aqsha berý jolymen kómek kórsetýge ýáde bergen adamdardyń kómegimen áskerge shaqyrýdy keiinge qaldyrý nemese bosatý máselelerin sheshýge tyryspańyz. Bul halyqtyń beihabar ekenin paidalanyp, onsyz da áskerge shaqyrýy keiinge qaldyrýdy qajet etetin isti qolǵa alatyn alaiaqtar», – deidi qorǵanys vedomstvosynyń ókili.
Polkovnik Sáken Júsipov bopsalaýda, ne týyndaǵan máselelerdi sheshý uzaqqa sozylǵan jaǵdaida Qarýly Kúshter – adaldyq alańy jobalyq ofisterine júginýdi usyndy. Áskerge shaqyrýǵa bailanysty barlyq rásimder keńes bere otyryp, barynsha ashyq formatta uiymdastyrylatynyn málimdedi.
Ol úshin jergilikti áskeri basqarý organdarynda elektrondyq poshta jáshikteri men áleýmettik jelilerde resmi akkaýnttar quryldy.
Áskeri qyzmetke shaqyrý tártibi jóninde bilý úshin Qorǵanys ministrliginiń sall-ortalyǵyna 8 (7172) 72 10 83, 72 16 06, 72 13 89; 72 13 82 telefondary arqyly habarlasýǵa bolady.
Eske salsaq, Osy jyldyń besinshi aqpanynda Qazaqstan Respýblikasynyń Prezidenti Qasym-Jomart Toqaev shaqyrý naýqanynyń bastalýy týraly Jarlyqqa qol qoidy.
