Úkimet basshysynyń orynbasary Berdibek Saparbaev mektepterdiń qaýipsizdigin qamtamasyz etý úshin barlyq mektepke videokamera ornatylatynyn málim etti, dep habarlaidy "Ult aqparat".
«Biz 2020-2025 jyldarǵa arnalǵan bilim salasyn damytý jónindegi memlekettik baǵdarlama qabyldadyq. Onyń negizgi mindeti – bilim sapasyn arttyrý. Osy ýaqytta biz 3 jas pen 6 jas aralyǵyndaǵy balalardy balabaqshamen 100 paiyz qamtamasyz etemiz. Aýyl men qalanyń arasyndaǵy aiyrmashylyqty azaitamyz. Apattyq jaǵdaidaǵy 121 mektep pen úsh aýysymdaǵy 37 mekteptiń bárin joiamyz. Oǵan qosymsha eldimekenderge internattar salamyz. 200-den astam mektepte sporzaldar paida bolady», - dedi Berdibek Saparbaev OKQ-da ótken baspasóz máslihatynda.
Úkimet basshysynyń orynbasarynyń aitýynsha, joǵarǵy bilim salasyna bólinetin qarjy 2 ese, ǵylymǵa beriletin qarjy 7 ese ósedi.
«Keiingi kezde Úkimetke JOO-lardyń sapasynyń nasharlyǵy boiynsha syn aitylyp júr. Bilim oryndarynyń kóbi jekemenshik. Byltyr jyl sońynda Úkimettiń komissiiasy quryldy. Jaqynda ǵana otyrysyn ótkizdik. Qazir 7 joǵary oqý ornyn biriktirý jóninde tapsyrma berildi. Árine, sonymen birge biz úshin eń úlken suraq – balalardyń, mektepterdiń qaýipsizdigin qamtamasyz etý, soǵan jaǵdai jasaý. Ol úshin biz birinshi qyrkúiekke deiin barlyq mektepterdi beinebaqylaýmen qamtamasyz etemiz», – dedi Berdibek Saparbaev.
