زىريان اۋدانىندا جاعداي تۇراقتالىپ, سۋ دەڭگەيٸ تٷستٸ. بۇل تۋرالى ايماق باسشىسى مەلٸمدەدٸ.
ايتا كەتسەك, دانيال احمەتوۆ بٷگٸن كەزەكتٸ رەت زىريان اۋدانىنا ات باسىن بۇرىپ, جاعدايدى جەكە ٶزٸ باقىلاپ قايتتى. قازٸرگٸ تاڭدا مۇنداعى توعىز ەلدٸ مەكەندە سۋدىڭ بەتٸ قايتىپ, دەڭگەيٸ تٷسكەن. قازٸرگٸ تاڭدا اۋدانداعى جالپى 414 ٷيدٸڭ, 285-ٸنەن سۋ كەتٸپ, 129-ىندا تيٸستٸ جۇمىستار جٷرگٸزٸلۋدە.
زىريان قالاسىنىڭ ەسكٸ بٶلٸگٸندە ەلٸ كٷنگە دەيٸن 74 ٷي سۋ استىندا تۇر. وبلىس ەكٸمٸ ولاردىڭ بەرٸ-داعى الداعى تاڭدا تۇرۋعا جارامسىز دەپ تانىلۋى ىقتيمال دەگەن باستاپقى بولجامىن جەتكٸزدٸ. سۋ دەڭگەيٸ 3 مەترگە جەتكەن ۋچاسكەدە بٷگٸن قوسىمشا تاعى بٸرنەشە سۋ سورعىش ناسوستار قويىلماق.
- بۇل جەردە 2 ملن.تەكشە مەترگە دەيٸن سۋ جاتىر. ولاردى سورۋ ٷشٸن ٶتە قۋاتتى تەحنيكالار قاجەت. بٷگٸن قوسىمشا تاعى ەكٸ ناسوس قوسامىز. ولار ساعاتىنا ەكٸ مىڭ تەكشە مەترگە دەيٸن سۋ سورۋعا قابٸلەتتٸ. وعان دەيٸن ناسوس ستانساسىنىڭ جان-جاعىن قۇممەن بەكٸتٸپ, سۋدى سورۋ تۋرالى تاپسىرما بەرٸلگەن بولاتىن. الايدا ول جۇمىس ەلٸ تولىق جٷزەگە اسپاعاندىقتان ەكٸ كٷن ٸشٸندە اۋدان ەكٸمدٸگٸنٸڭ باسشىلىعىنا سۋدان تولىق تازارتۋ تۋرالى تاپسىرما بەرٸلدٸ, - دەيدٸ دانيال احمەتوۆ.
بۇقتىرما ٶزەنٸنٸڭ ارناسىنداعى مۇزدى جارۋ جۇمىسى ٷش كٷن بويى جٷرگٸزٸلدٸ. وسى ۋاقىت ارالىعىندا 17 توننا جارىلعىش زاتتار قولدانىلدى. نەتيجەسٸندە, سۋ دەڭگەيٸ 2,5 ەسەگە ازايىپ, تٶمەن تٷستٸ. سول كەزدەگٸ ٶزەكتٸ مەسەلە – ماليەۆسك اۋىلى مەن زۋبوۆسك كەنتٸن تولىق سۋ باسىپ كەتۋ قاۋپٸنٸڭ الدى الىندى. بٷگٸندە ماليەۆسكٸدەگٸ 97, زۋبوۆسكٸدەگٸ 114 ٷيدەن سۋ قايتىپ, تۇرعىندار باسپانالارىنا ورالۋدا.
- جالپى سانى 414 ٷيگە سۋ كٸردٸ. بارلىق تۇرعىنداردىڭ شىعىنى ارنايى كوميسسييامەن ەسەپتەلٸنەدٸ. قازٸر قالادا 60 پەتەرلٸ جاڭا تۇرعىن ٷيدٸڭ قۇرىلىسى جٷرٸپ جاتىر. سونىمەن قاتار, ەكٸنشٸ دەڭگەيلٸ نارىقتا ساتىلىمعا قويىلعان باسپانالاردىڭ ەسەبٸ دايىندالۋدا. ايتارىم, دٷيسەنبٸگە دەيٸن ٷي مەسەلەسٸن شەشۋ جولى ناقتى بەلگٸلٸ بولادى, - دەدٸ ايماق باسشىسى.
اۋداندارداعى ٷيلەردٸڭ بٷگٸنگٸ جاي-كٷيٸمەن تانىسقان دانيال احمەتوۆ, ەۆاكۋاتسييا پۋنكتەردە جاتقان تۇرعىندارمەن كەزدەستٸ. ايتا كەتۋ كەرەك, بارلىق ەۆاكۋاتسييالانعان زىرياندىقتار جاتار ورىن, كيٸم-كەشەك, ٷش ۋاقىت تاماقپەن قامتاماسىز ەتٸلگەن. «جاسالعان جاعدايعا كٶڭٸلدەرٸڭٸز تولىپ جاتىر ما?» دەگەن وبلىس ەكٸمٸ ساۋالىنا اقساقالدار مەن اقجاۋلىقتى ەجەلەر «تٸپتٸ تٶرت ۋاقىت تاماق بەرەدٸ. جاقسى قاراپ جاتىر. كٶڭٸلٸمٸز توق» دەپ, جاۋاپ قايىردى.
الداعى تاڭدا كاتون-قاراعاي اۋدانىنداعى سەننوە ەلدٸ مەكەنٸ اۋماعىندا دا مۇز كەپتەلٸسٸ تۋىنداۋ قاۋپٸ بار. ونداعى مۇزدى جارۋ ناۋقانىن ەرتەڭ باستاۋدى تاپسىردى دانيال احمەتوۆ.
جالپى, بٸرەر كٷندە ٶڭٸر بويىنشا كٷن رايى جىلىنىپ, تەمپەراتۋرا كٶرسەتكٸشٸ 17 گرادۋسقا دەيٸن كٶتەرٸلەدٸ دەپ كٷتٸلۋدە. سول سەبەپتٸ ايماقتى سۋ الۋ قاۋپٸنٸڭ كەزەكتٸ تولقىنى باستالۋى ىقتيمال. ونىڭ الدىن-الۋ شارالارىنا جەرگٸلٸكتٸ بيلٸك بارىنشا دايىندىق جٷرگٸزۋدە.
