جەزقازعان مىس قورىتۋ زاۋىتىندا ٶرت شىقتى. بۇل تۋرالى قر تٶتەنشە جاعدايلار مينيسترلٸگٸنٸڭ رەسمي ٶكٸلٸ تالعات ۋەلي مەلٸم ەتتٸ, دەپ حابارلايدى "ۇلت اقپارات".
«27 مامىر كٷنٸ ساعات 08-53-تە «قازاقمىس» كورپوراتسيياسى» جشس-نىڭ جەزقازعان مىس قورىتۋ زاۋىتىندا ٶرت شىققانى تۋرالى حابارلاما كەلٸپ تٷستٸ. مىس قورىتۋ تسەحىنداعى ترانسفورماتوردىڭ ٶرتەنەتٸن بٶلٸگٸ, شامامەن 100 شارشى مەتر اۋماققا تٶگٸلگەن ماي جانعان. زارداپ شەككەندەر مەن قازا تاپقاندار جوق. مىس قورىتۋ تسەحىنداعى ٶندٸرٸستٸك پروتسەسس ۋاقىتشا توقتاتىلدى», - دەدٸ تالعات ۋەلي.
رەسمي ٶكٸلدٸڭ اتاپ ٶتۋٸنشە, ٶرتتٸ سٶندٸرۋگە قاراعاندى وبلىستىق تٶتەنشە جاعدايلار دەپارتامەنتٸ جەكە قۇرامىنىڭ 26 مامانى مەن 7 تەحنيكاسى, سونىمەن قاتار «سەرٸكتەس» جشس-نٸڭ ٶرت سٶندٸرۋ قىزمەتٸنٸڭ 13 مامانى مەن 3 تەحنيكاسى جۇمىلدىرىلعان.
