بيىلعى جاستار جىلىندا اتقارىلعان يگٸلٸكتٸ ٸستەردٸڭ نەتيجەسٸ كٶرٸنە باستادى. بۇل تۋرالى ٶڭٸرلٸك كوممۋنيكاتسييا قىزمەتٸ الاڭىندا «قازاقستان رەسپۋبليكاسى پرەزيدەنتٸنٸڭ جانىنداعى جاستار كادر رەزەرۆٸ» تاقىرىبىندا ٶتكەن بريفينگتە قر مەملەكەتتٸك قىزمەت ٸستەرٸ اگەنتتٸگٸ وبلىس بويىنشا دەپارتامەنتٸنٸڭ باسشىسى سەرٸكباي نۇرعيساەۆ ايتىپ بەردٸ.
ٶز سٶزٸن پرەزيدەنت جولداۋىنداعى تىڭ جاڭالىقتار مەن ٶزگەرٸستەرگە ەكەلەر سەتتٸ قادامداردان باستاعان دەپارتامەنت باسشىسى الداعى ۋاقىتتا مەملەكەتتٸڭ دامۋى ٷشٸن بەلسەنە ەڭبەك ەتەتٸن جاس كادرلاردى تاڭداۋ ٷشٸن قولعا الىنعان جوبانىڭ قۇندىلىعىن تٸلگە تيەك ەتتٸ.
– بەرٸمٸزگە بەلگٸلٸ, ەلباسى بيىلعى جىلدى «جاستار جىلى» دەپ جارييالادى. وسى رەتتە جاستاردىڭ جالىندى باستاماسىن قولداعان كٶپتەگەن جاقسى ٸستەر اتقارىلدى. سول جەتٸستٸكتٸڭ جەلٸسٸ رەتٸندە, مٸنە, بٷگٸندە قر پرەزيدەنتتٸك جاستار كادر رەزەرۆٸن قۇرۋ قولعا الىندى. بۇل پرەزيدەنتتٸڭ جۋىرداعى حالىققا جولداۋىندا دا ايتىلدى. بۇل ورايداعى ماقسات – قىزمەتتٸك ٶسۋگە ىنتالى, كەسٸبي داعدىلارى مەن باسقارۋ بٸلٸكتٸلٸگٸنە يە, ٶزٸن-ٶزٸ كەسٸبي دامىتۋعا, ساراپتامالىق اقىل-كەڭەسٸن ايقىن كٶرسەتە الاتىن كٶشباسشى جاستاردى تاڭداپ شىعۋ, – دەدٸ ول.
قازٸرگٸ تاڭدا مەملەكەتتٸك قىزمەت ٸستەرٸ اگەنتتٸگٸنٸڭ رەسمي سايتىندا اۆتوماتتاندىرىلعان ونلاين-پلاتفورما ٸسكە قوسىلىپ, قۇجاتتاردى قابىلداۋ ٸسٸ باستالىپ كەتتٸ. ونلاين-پلاتفورمانى قولدانۋ جەڭٸل ەرٸ ٶتە ىڭعايلى. ٷمٸتكەر سايتتىڭ باستى بەتٸنەن پرەزيدەنتتٸڭ جاستار كادر رەزەرۆٸن ٸرٸكتەۋگە قاتىستى اقپاراتتى ينفوگرافيكا ارقىلى بٸلە الادى. وعان 35 جاسقا دەيٸنگٸ جوعارى بٸلٸمٸ بار, 5 جىلدىق قىزمەت ٶتٸلٸ بار قازاقستان رەسپۋبليكاسىنىڭ ازاماتتارى قاتىسۋعا قۇقىلى. جالپى رەزەرۆكە تاڭداۋ جۇمىسى 3 كەزەڭنەن تۇرادى. بٷگٸنگە دەيٸن 2 مىڭعا جۋىق جاس ٶتٸنٸش تاپسىرىپ, ونىڭ جٷزگە جۋىعى بٸرٸنشٸ تۋردان ٶتتٸ. ايتا كەتەرلٸگٸ, 5 جىلدىق قىزمەت ٶتٸلٸ تەك مەملەكەتتٸك قىزمەتكە قاتىستى ەمەس, اۋىل, اۋدان, وبلىستا جۇمىس ٸستەدٸ دەگەن بٶلٸپ-جارۋ دا جوق, قوعامنىڭ سان سالاسىنداعى تەجٸريبەلٸ جاستار باعىن سىناپ كٶرۋگە بولادى. تٸپتٸ, شەتەلدەردە جۇمىس ٸستەيتٸن قازاقستان ازاماتتارىنا دا قاتىسۋعا بولادى. ٶتٸنٸم تاپسىرۋ قيىن ەمەس. جاستار ٸرٸكتەۋگە قاتىسۋ ٷشٸن جەكە باسىن كۋەلاندىراتىن, بٸلٸمٸ, ەڭبەك ٶتٸلٸ تۋرالى قۇجاتتاردىڭ كٶشٸرمەسٸن تاپسىرسا بولعانى. قۇجاتتارعا ۇسىنىم حات قوسا بەرٸلەدٸ. ونى جۇمىس ٸستەيتٸن مەكەمەدەن الۋعا بولادى.
تاعى دا ايتا كەتەرلٸگٸ, جاستار كادر رەزەرۆٸنە جولدانعان ٶتٸنٸم اشىق ەرٸ جالپىلىق سيپات الادى. ٶتٸنٸمدەردٸ قر پرەزيدەنتٸنٸڭ جانىنان قۇرىلعان ۇلتتىق كوميسسييا ساراپتايدى. بۇل كوميسسييانىڭ تٶراعالىعىنا پرەزيدەنت ەكٸمشٸلٸگٸنٸڭ باسشىسى قىرىمبەك كٶشەرباەۆ تاعايىندالعان. ٶتٸنٸم تاپسىرعاندار مەن ساراپتاۋدان ٶتكەندەردٸڭ اتى-جٶنٸ سايتتا اشىق كٶرسەتٸلٸپ تۇرادى. جوعارىدا ايتىلعان ٷش كەزەڭنەن ٶتكەن جاستار كادرلىق رەزەرۆكە الىنادى. ونىڭ ۋاقىت شەگٸ – 5 جىل. ولار وسى جىلدار ارالىعىندا سالالىق لاۋازىمدار مەن جاۋاپتى قىزمەتتەرگە تاعايىندالا الادى.
سەرٸكباي ٶرٸكبايۇلىنىڭ بايانداماسىنان كەيٸن جۋرناليستەر كٶكەيدە جٷرگەن سۇراقتارىن قويىپ, ناقتى جاۋاپ الدى.
ق. وماراقىنۇلى
