ورتا سالماقتاعى WBO بەلبەۋٸنٸڭ يەگەرٸ جەنٸبەك ەلٸمحانۇلىنىڭ مەنەدجەرٸ بەرٸك سۇلتان ٶزٸنٸڭ youtube-ارناسىندا سپورتشىنىڭ جەكپە-جەككە دەيٸن العان جاراقاتى تۋرالى ايتتى, دەپ حابارلايدى قازاقپارات.
«ايقاسقا ەكٸ اپتا ۋاقىت قالدى. وسى جەكپە-جەك بولماي قالادى-اۋ دەپ ۋايىمدادىم. سپاررينگ كەزٸندە جەنٸبەك باۋىردان سوققى جاساۋ بارىسىندا سول قولىنىڭ ساۋساعىن قاتتى جاراقاتتاپ الدى. «بولدى, ساۋساعى سىندى عوي» دەپ ويلادىم. ٶيتكەنٸ بٸز اقش-قا العاش رەت كەلگەندە, بٷيٸردەن ۇرعان كەزدە, تۋرا سول جەرٸن سىندىرعان بولاتىن, بٸز وعان جەتٸ مىڭ دوللارعا وتا جاساتتىق. مەن جەكپە-جەكتٸڭ بولمايتىنىنا 95%-عا سەنٸمدٸ بولدىم, تٶرت اي بويى بٸز اقش-تا بولدىق كٶپ جۇمىس ٸستەلدٸ, قانشاما تەر تٶكتٸك, جەكپە-جەك كٷزگە اۋىسادى-اۋ دەپ ويلادىم. بٸراق قولى سىنباعان, سەل اۋىرتىپ العان», — دەدٸ مەنەدجەر جەنٸبەك تۋرالى دەرەكتٸ فيلمدە.
ەسكە سالا كەتەيٸك, جەنٸبەك ەلٸمحانۇلى 22 مامىر كٷنٸ بريتاندىق سپورتشى دەنني ديگنۋمدى نوكاۋتقا جٸبەرٸپ, ورتا سالماقتا WBO تيتۋلىن يەلەنگەن بولاتىن.
