جەنٸبەك ەلٸمحانۇلى. فوتو: Top Rank©
قازاقستاندىق بوكسشىسى جەنٸبەك ەلٸمحانۇلى (11-0, 7 كو) ۇلىبريتانييالىق دەنني ديگنۋمگە (14-0-1, 8 كو) قارسى جەكپە-جەكتەگٸ ماقساتى مەن قازاق ستيلٸ دەگەن نە ەكەنٸن ايتتى, - دەپ حابارلايدى Tengrinews.kz اگەنتتٸگٸ Vesti.kz سايتىنا سٸلتەمە جاساپ.
جەكپە-جەك 21 مامىردا لاس-ۆەگاستا (اقش) ٶتەدٸ. بوكسشىلار ورتا سالماقتا WBO تۇجىرىمى بويىنشا ۋاقىتشا ەلەم چەمپيونى تيتۋلىن ساراپقا سالادى.
"قازاق ستيلٸ دەگەنٸمٸز - رينگتٸڭ تٶرت بۇرىشىن قولدانىپ جٷرٸپ جۇدىرىقتاسۋ. الدا دا, ارتتا دا جۇمىس ٸستەۋ, قورعانىپ تۇرىپ قارىمتا شابۋىل جاساۋ, قارىمتا شابۋىلدان كەيٸن قورعانۋ. بىلايشا ايتقاندا, 12 راۋندتا 12 رەت ٶزگەرەتٸن ستيل. رينگكە شىققان كەزدە قارسىلاسقا بايلانىستى بەيٸمدەلەسٸڭ. مىقتى قارسىلاس بولسا, نەشە تٷرلٸ تاكتيكا, نەشە تٷرلٸ جاقىن جەكپە-جەكتەر, نەشە تٷرلٸ الداۋلار, نەشە تٷرلٸ قورعانۋلار كٶرسەتۋگە بولادى. بٸزدٸڭ قازاق ستيلٸ ٶتە باي. اقش-تا بٸر بەلبەۋ ٷشٸن جٷرگەن جوقپىز. قازٸرگٸ ماقساتىمىز - قازاق ستيلٸن تاريحتا قالدىرۋ. ٶيتكەنٸ بٸزدٸ ەۋەسقوي بوكستا تاني بەرگەنٸمەن, كەسٸپقوي بوكستا تانىپ جاتقانى از", - دەدٸ بوكسشى.
