جامبىل وبلىسى جامبىل اۋدانىنا قاراستى جاسٶركەن اۋىلىنداعى «مٶلدٸر» بالاباقشا-مەكتەپ گيمنازيياسىنىڭ 2-سىنىپ وقۋشىسى جٸبەك يسابەك جۋىردا ەل پرەزيدەنتٸ قاسىم-جومارت كەمەلۇلى توقاەۆقا جٷرەكجاردى تٸلەگٸن جازعان ەدٸ, دەپ حابارلايدى قازاقپارات.
ساباق ٷلگەرٸمٸ جاقسى, وزات وقۋشىلاردىڭ بٸرٸ – جٸبەكتٸڭ جٷرەگٸ دە مەيٸرٸمگە تولى. ونىڭ حاتى مەملەكەت باسشىنىڭ قولىنا تيگەن.
ەل پرەزيدەنتٸ جٸبەككە جازعان حاتىندا جامبىلدىق وقۋشىنىڭ حاتىن اسا ريزاشىلىقپەن وقىعانىن ايتقان.
«ماعان جولداعان ىستىق لەبٸزٸڭ ٷشٸن راحمەت. سەنٸڭ ەرتەڭگٸ كٷنٸ ٷلكەن ازامات بولىپ ٶسٸپ, ەلٸمٸزدٸڭ پاراساتتى پەرزەنتٸ اتاناتىنىڭا كەمٸل سەنەمٸن. بٸزدٸڭ بٷگٸن قولعا الىپ جاتقان جۇمىسىمىزدىڭ بارلىعى دا جارقىن بولاشاعىمىزدىڭ يەسٸ – ٶزدەرٸڭە ارنالادى. سوندىقتان ساباعىڭدى ٷزدٸك وقىپ, ۇستازدارىڭ مەن اناڭنىڭ بەرگەن تەلٸم-تەربيەسٸن بويىڭا سٸڭٸرٸپ, ماقساتقا ۇمتىلۋدان جالىقپا. وتباسىڭنىڭ قاشان دا ماقتانىشى بولىپ, جەتٸستٸكتەرگە جەتە بەر, اينالايىن! اناڭ مەن باۋىرىڭا مەنەن سەلەم», - دەگەن قاسىم-جومارت كەمەلۇلى جامبىل اۋدانىنىڭ وقۋشىسىنا نوۋتبۋك تارتۋ ەتكەن.
ٶز كەزەگٸندە حاتتىڭ يەسٸن بٷگٸن وبلىس ەكٸمٸ بەردٸبەك ساپارباەۆ ارنايى قابىلداپ, «مۇنداي حاتتى جٷرەكتٸ قىز جازادى» دەپ تاڭداندى.
ٸزگٸ نيەتٸن كٶرسەتكەن بەردٸبەك ماشبەكۇلى جٸبەككە سمارتفون مەن كٸتاپ سىيعا تارتتى.
