رەسەيلٸك ەنشٸ زەمفيرا كيپردٸڭ ليماسول قالاسىندا ٶتكەن كونتسەرتٸندە ۋكرايناداعى سوعىسقا قارسى سٶيلەگەن. زالداعى تىڭداۋشىلاردىڭ بٸرٸ جازىپ العان ۆيدەو جەكسەنبٸنٸڭ كەشٸندە "چتد" تەلەگرام-ارناسىندا پايدا بولعان.
"بٷگٸن سوعىستىڭ باستالعانىنا 228 كٷن بولدى, 228 كٷن توزاق, - دەيدٸ زەمفيرا. – وسى ۋاقىتتا كٶپ ويلاندىم. ساحنادا سٶيلەگەندٸ ۇناتپايمىن, سٶيلەي دە المايمىن, بٸراق مەنٸڭ ەلٸم وسى سوعىستى توقتاتسا ەكەن دەپ كٷندە قۇدايدان تٸلەيمٸن". وسى سٶزٸنەن سوڭ ەنشٸ "اتپاڭدار" دەگەن ەنٸن سالعان.
زەمفيرا ليماسولدان كەيٸن تەل-اۆيۆ, ستامبۋل, ۆەنا, پراگا, وففەنباح-ام-ماين, گامبۋرگ, بەرلين, پاريج جەنە گااگا قالالارىندا كونتسەرت ٶتكٸزەدٸ. تۋرنە 3 قاراشادا لوندوننىڭ Royal Albert Hall كونتسەرت زالىندا اياقتالادى.
بيىل اقپاندا رەسەي ۋكرايناعا باسىپ كٸرگەن سوڭ رەسەيدٸڭ كٶپتەگەن بەلگٸلٸ مۋزىكانتتتارى سوعىسقا قارسىلىعىن بٸلدٸرگەن. وسىعان بايلانىستى ولاردىڭ رەسەيدەگٸ كونتسەرتتەرٸنە تىيىم سالىنعان. مۋزىكانتتاردىڭ كەيبٸرٸ رەسەيدەن كەتٸپ قالسا, كەيبٸرٸ قىسىمعا ۇشىراعان. رەسەي بيلٸگٸ رەپەر وكسيميروندى "شەتەل اگەنتٸ" دەسە, ەنشٸ يۋريي شەۆچۋككە رەسەي ەسكەرٸنە تٸل تيگٸزگەنٸ ٷشٸن 50 مىڭ رۋبل ايىپپۇل سالعان.
ماۋسىم ايىنان باستاپ رەسەيدٸڭ كونتسەرت اگەنتتٸكتەرٸ "ساحنادا سوعىسقا قارسى سٶز ايتپاۋ" تۋرالى ەنشٸلەرمەن كەلٸسٸم جاساسا باستاعان. ەرتٸستەرگە ۋكراينانىڭ مەملەكەتتٸك سيمۆولدارىن پايدالانۋعا تىيىم سالعان.
