قازاقستاندىق باكتيەر زاينۋتدينوۆ قىركٷيەك ايىنىڭ قورىتىندىسى بويىنشا مەسكەۋلٸك تسسكا كلۋبىنىڭ ٷزدٸك ويىنشىسى اتاندى, دەپ حابارلايدى "ۇلت اقپارات".
تسسكا فۋتبول كلۋبى مەلٸم ەتكەنٸندەي, ول ٶتكەن ايدا كوماندانىڭ بارلىق ٷش ويىنىنا قاتىسقان.
كلۋبتىڭ رەسمي سايتىندا جانكٷيەرلەر اراسىندا ٶتكەن داۋىس بەرۋ نەتيجەسٸندە قازاقستان ۇلتتىق قۇراماسىنىڭ ويىنشىسى ب.زاينۋتدينوۆ ٷزدٸك شىقتى. ول داۋىستىڭ 37 پايىزىن جينادى. حورۆاتييالىق نيكولا ۆلاشيچ ەكٸنشٸ (23 پايىز), قاقپاشى يگور اكينفەەۆ ٷشٸنشٸ (18 پايىز) ورىندا.
داۋىس بەرۋگە بارلىعى 12544 ادام قاتىستى.
رەسەي پرەمەر-ليگاسىندا 19 ۇپايمەن ٷشٸنشٸ ورىندا كەلە جاتقان تسسكا كەزەكتٸ ويىنىن 18 قازان كٷنٸ «دينامو» (مەسكەۋ) كومانداسىمەن ٶتكٸزەدٸ. ال 22 قازاندا ەۋروپا ليگاسىنىڭ ك توبىندا اۋسترييادا «ۆولفسبەرگ» كلۋبىمەن الاڭعا شىعادى.
