قازاقستان اۋماعىندا كٶكتەمگٸ ەگٸس ناۋقانى تولىعىمەن اياقتالدى. بۇل تۋرالى ٷكٸمەت وتىرىسىندا اۋىل شارۋاشىلىعى مينيسترٸ ساپارحان وماروۆ مەلٸم ەتتٸ, دەپ حابارلايدى قازاقپارات.
«ەكٸمدٸكتەردٸڭ جەدەل دەرەكتەرٸ بويىنشا بيىل اۋىل شارۋاشىلىعى داقىلدارى 22,7 ملن گەكتار الاڭعا ەگٸلدٸ, بۇل 2020 جىلعى دەڭگەيدەن 78 مىڭ گەكتارعا كٶپ. اعىمداعى جىلعى 3 ماۋسىمداعى جاي-كٷي بويىنشا كٶكتەمگٸ ەگٸس تولىعىمەن اياقتالدى, جازدىق ەگٸس الاڭى 19 ملن گەكتاردى, ونىڭ ٸشٸندە دەندٸ داقىلدار 15,2 ملن گەكتاردى قۇرادى», - دەدٸ س. وماروۆ.
ونىڭ ايتۋىنشا, ەگٸس الاڭدارىنىڭ قۇرىلىمىن رەنتابەلدٸلٸگٸ جوعارى داقىلداردىڭ, سونداي-اق يمپورتتى الماستىرۋعا باعىتتالعان داقىلداردىڭ پايداسىنا ەرتاراپتاندىرۋ جۇمىسى جٷرگٸزٸلدٸ. وسىلايشا, بيىل مايلى داقىلدار الاڭى 11,9 مىڭ گەكتارعا, كٶكٶنٸس-باقشا داقىلدارى الاڭى 10,6 مىڭ گەكتارعا, كارتوپ الاڭى 5,8 مىڭ گەكتارعا, ازىقتىق داقىلدار الاڭى 104,2 مىڭ گەكتارعا ۇلعايدى.
«ٶسٸمدٸك شارۋاشىلىعىن ەرتاراپتاندىرۋ ماقساتتارىنىڭ بٸرٸ كٷرٸش پەن ماقتا سيياقتى ىلعالدى كٶپ قاجەت ەتەتٸن داقىلدار الاڭدارىن بٸرتٸندەپ قىسقارتۋ بولىپ وتىر. مەسەلەن, كٷرٸش الاڭى 8,1 مىڭ گەكتارعا, ماقتا الاڭى 18 مىڭ گەكتارعا قىسقارتىلدى», - دەدٸ مينيستر.
