Qazaqstan aýmaǵynda kóktemgi egis naýqany tolyǵymen aiaqtaldy. Bul týraly Úkimet otyrysynda Aýyl sharýashylyǵy ministri Saparhan Omarov málim etti, dep habarlaidy QazAqparat.
«Ákimdikterdiń jedel derekteri boiynsha biyl aýyl sharýashylyǵy daqyldary 22,7 mln gektar alańǵa egildi, bul 2020 jylǵy deńgeiden 78 myń gektarǵa kóp. Aǵymdaǵy jylǵy 3 maýsymdaǵy jai-kúi boiynsha kóktemgi egis tolyǵymen aiaqtaldy, jazdyq egis alańy 19 mln gektardy, onyń ishinde dándi daqyldar 15,2 mln gektardy qurady», - dedi S. Omarov.
Onyń aitýynsha, egis alańdarynyń qurylymyn rentabeldiligi joǵary daqyldardyń, sondai-aq importty almastyrýǵa baǵyttalǵan daqyldardyń paidasyna ártaraptandyrý jumysy júrgizildi. Osylaisha, biyl maily daqyldar alańy 11,9 myń gektarǵa, kókónis-baqsha daqyldary alańy 10,6 myń gektarǵa, kartop alańy 5,8 myń gektarǵa, azyqtyq daqyldar alańy 104,2 myń gektarǵa ulǵaidy.
«Ósimdik sharýashylyǵyn ártaraptandyrý maqsattarynyń biri kúrish pen maqta siiaqty ylǵaldy kóp qajet etetin daqyldar alańdaryn birtindep qysqartý bolyp otyr. Máselen, kúrish alańy 8,1 myń gektarǵa, maqta alańy 18 myń gektarǵa qysqartyldy», - dedi ministr.
