ەۋروكوميسسييا باسشىسى ۋرسۋلا فون دەر ليايەن "ەۋرووداق ۋكراينانى ەرٸ قاراي دا قولداي بەرەدٸ جەنە رەسەي پرەزيدەنتٸ ۆلاديمير پۋتيندٸ ەسكەري باسقىنشىلىعى ٷشٸن "جوعارى قۇن" تٶلەۋگە مەجبٷرلەيدٸ" دەدٸ.
وسى اپتا سوڭىندا ۋكرايناعا كەلگەن ۋرسۋلا فون دەر ليايەن ساپارىن ونداعان بەيبٸت تۇرعىن قىرىلعان بۋچا قالاسىنان باستادى. ول - قاندى قىرعىن ورنىنا بارعان ەۋرووداقتىڭ العاشقى جوعارى لاۋازىمدى تۇلعاسى.
ٶتكەن اپتانىڭ سوڭىندا رەسەي ەسكەرٸ كەتكەننەن كەيٸن بۋچا قالاسىنان ونداعان ادامنىڭ مەيٸتٸ تابىلىپ, حالىقارالىق قاۋىمداستىق ەسكەري قىلمىستى قاتاڭ ايىپتاعان.
قالانى ارالاپ, باۋىرلاستار زيراتىنا بارعان فون دەر ليايەن قۇربانداردى ەسكە الىپ, شٸركەۋدە مايشام جاقتى.
فون دەر ليايەن ساپارىن بۋچادان باستاۋ ٶتە ماڭىزدى ەكەنٸن, سەبەبٸ مۇندا ادامدىققا نۇقسان كەلگەنٸن, سونداي-اق كٸنەلٸلەر قىلمىسى ٷشٸن جاۋاپقا تارتىلاتىنىن اتاپ ٶتتٸ. "بۇل - بٸزدٸڭ ورتاق كٷرەسٸمٸز" دەدٸ ەۋروكوميسسييا جەتەكشٸسٸ.
بۇدان سوڭ ول ۋكراينا پرەزيدەنتٸ ۆلاديمير زەلەنسكييمەن بريفينگ ٶتكٸزٸپ, كيەۆتٸڭ ەۋرووداققا قوسىلۋ تۋرالى ٶتٸنٸشٸن تەزٸرەك قاراۋعا ۋەدە بەردٸ. ول زەلەنسكييگە وداققا ەنۋ پروتسەسٸن باستاۋ بويىنشا سۇراقتار جيناعىن تاپسىردى.
