ۋكراينا ەۋروپالىق وداققا قوسىلۋ جٶنٸندەگٸ كەلٸسسٶزدەردە تاعى بٸر ماڭىزدى كەزەڭگە ٶتتٸ. بريۋسسەلدە ٶتكەن جيىندا ەو ەلدەرٸنٸڭ مينيسترلەرٸ ۋكراينا ٷشٸن كەلٸسسٶزدەردٸڭ التىنشى كلاستەرٸن اشۋدى رەسمي تٷردە ماقۇلدادى, دەپ حابارلايدى ult.kz.
التىنشى كلاستەر ەۋروپالىق وداقتىڭ سىرتقى بايلانىستارى مەن حالىقارالىق ساياساتىنا قاتىستى مەسەلەلەردٸ قامتيدى. بۇل باعىت ۋكراينا زاڭناماسى مەن سىرتقى ساياسي ۇستانىمدارىنىڭ ەو تالاپتارىنا قانشالىقتى سەيكەس كەلەتٸنٸن باعالاۋعا مٷمكٸندٸك بەرەدٸ.
يرلاندييانىڭ مەملەكەتتٸك مينيسترٸ توماس بيرن بۇل شەشٸمدٸ ۋكراينانىڭ ەۋرووداققا مٷشەلٸك جولىنداعى ماڭىزدى بەلەس دەپ اتادى.
«بٷگٸن ۋكراينا ٷشٸن تاعى بٸر نەگٸزگٸ كەلٸسسٶز كلاستەرٸن اشىپ, ونىڭ ەو-عا مٷشەلٸك جولىنداعى ماڭىزدى كەزەڭگە جەتتٸك. بۇل ەلدٸڭ مٷمكٸندٸگٸنشە جىلدام ٸلگەرٸلەۋگە ۇمتىلىپ وتىرعانىن كٶرسەتەدٸ», – دەدٸ ول.
قازٸرگٸ ۋاقىتتا يرلاندييا ەۋروپالىق وداق كەڭەسٸنە روتاتسييالىق نەگٸزدە تٶراعالىق ەتٸپ وتىر جەنە كەلٸسسٶزدەردە ۇيىمعا مٷشە 27 مەملەكەتتٸڭ ورتاق ۇستانىمىن بٸلدٸرەدٸ.
بۇعان دەيٸن بٸر عانا كلاستەر اشىلعان
وسى ۋاقىتقا دەيٸن ۋكراينا ٷشٸن كەلٸسسٶزدەردٸڭ بٸرٸنشٸ كلاستەرٸ عانا اشىلعان بولاتىن. ول دەموكراتييالىق ينستيتۋتتار, قۇقىق ٷستەمدٸگٸ, مەملەكەتتٸك باسقارۋ جەنە نەگٸزگٸ قۇقىقتار سەكٸلدٸ بازالىق مەسەلەلەردٸ قامتيدى.
ەۋروكوميسسييا ۋكراينا مەن مولدوۆانى بارلىق كەلٸسسٶز كلاستەرٸن اشۋعا تەحنيكالىق تۇرعىدان دايىن دەپ سانايدى. الايدا ەربٸر كەلەسٸ كەزەڭ ەو قۇرامىنداعى 27 مەملەكەتتٸڭ ساياسي كەلٸسٸمٸن تالاپ ەتەدٸ.
التىنشى كلاستەردٸڭ مولدوۆا ٷشٸن دە اشىلاتىنى حابارلاندى. ۋكراينا مەن مولدوۆانىڭ ەۋرووداققا مٷشەلٸك پروتسەستەرٸ ٶزارا بايلانىستى تٷردە قاراستىرىلىپ كەلەدٸ.
ۋكراينا مەن مولدوۆا 2022 جىلى رەسەيدٸڭ ۋكرايناعا كەڭ كٶلەمدٸ باسىپ كٸرۋٸنەن كەيٸن ەۋروپالىق وداققا مٷشەلٸككە ٶتٸنٸش بەرگەن.
الايدا ۋكراينانىڭ كەلٸسسٶز پروتسەسٸ ۆەنگرييانىڭ بۇرىنعى پرەمەر-مينيسترٸ ۆيكتور ورباننىڭ قارسىلىعىنا بايلانىستى ەكٸ جىلعا جۋىق ۋاقىت باياۋلاعان. وربان كيەۆ بيلٸگٸنٸڭ ۋكراينانىڭ باتىسىنداعى ۆەنگر ازشىلىعىنىڭ قۇقىقتارىنا قاتىستى ساياساتىن سىنعا الىپ, ەو كەڭەسٸندەگٸ شەشٸمدەرگە توسقاۋىل قويىپ كەلگەن.
ۆەنگريياداعى پارلامەنت سايلاۋىنان كەيٸن بيلٸككە پەتەر ماديار باستاعان جاڭا ٷكٸمەت كەلگەن سوڭ, ۋكراينا مەن مولدوۆانىڭ مٷشەلٸك پروتسەسٸ قايتا جاندانا باستادى. جاڭا ۆەنگرييا ٷكٸمەتٸ ۋكراين تاراپىمەن ۇلتتىق ازشىلىقتاردىڭ قۇقىقتارىنا قاتىستى داۋلى مەسەلەلەردٸ رەتتەۋ بويىنشا كەلٸسسٶز جٷرگٸزگەن.
ەۋرووداقتىڭ كەڭەيۋ مەسەلەلەرٸ جٶنٸندەگٸ كوميسسارى مارتا كوس قازٸرگٸ ساياسي سەرپٸندٸ ناقتى نەتيجەگە اينالدىرۋ قاجەتتٸگٸن ايتتى.
ەو-عا كٸرۋ پروتسەسٸندە ٷمٸتكەر مەملەكەت وداق زاڭناماسىنا سەيكەس كەلەتٸن بٸرنەشە ونداعان باعىت بويىنشا رەفورمالار جٷرگٸزۋٸ كەرەك. بۇل باعىتتار التى نەگٸزگٸ كەلٸسسٶز كلاستەرٸنە بٸرٸكتٸرٸلگەن. بارلىق تالاپ ورىندالىپ, ەو-عا مٷشە مەملەكەتتەر كەلٸسٸم بەرگەن جاعدايدا عانا ەلدٸڭ ۇيىمعا قوسىلۋى مٷمكٸن.
