Ýkraina Eýropalyq odaqqa qosylý jónindegi kelissózderde taǵy bir mańyzdy kezeńge ótti. Briýsselde ótken jiynda EO elderiniń ministrleri Ýkraina úshin kelissózderdiń altynshy klasterin ashýdy resmi túrde maquldady, dep habarlaidy ult.kz.
Altynshy klaster Eýropalyq odaqtyń syrtqy bailanystary men halyqaralyq saiasatyna qatysty máselelerdi qamtidy. Bul baǵyt Ýkraina zańnamasy men syrtqy saiasi ustanymdarynyń EO talaptaryna qanshalyqty sáikes keletinin baǵalaýǵa múmkindik beredi.
Irlandiianyń memlekettik ministri Tomas Birn bul sheshimdi Ýkrainanyń Eýroodaqqa múshelik jolyndaǵy mańyzdy beles dep atady.
«Búgin Ýkraina úshin taǵy bir negizgi kelissóz klasterin ashyp, onyń EO-ǵa múshelik jolyndaǵy mańyzdy kezeńge jettik. Bul eldiń múmkindiginshe jyldam ilgerileýge umtylyp otyrǵanyn kórsetedi», – dedi ol.
Qazirgi ýaqytta Irlandiia Eýropalyq odaq keńesine rotatsiialyq negizde tóraǵalyq etip otyr jáne kelissózderde uiymǵa múshe 27 memlekettiń ortaq ustanymyn bildiredi.
Buǵan deiin bir ǵana klaster ashylǵan
Osy ýaqytqa deiin Ýkraina úshin kelissózderdiń birinshi klasteri ǵana ashylǵan bolatyn. Ol demokratiialyq institýttar, quqyq ústemdigi, memlekettik basqarý jáne negizgi quqyqtar sekildi bazalyq máselelerdi qamtidy.
Eýrokomissiia Ýkraina men Moldovany barlyq kelissóz klasterin ashýǵa tehnikalyq turǵydan daiyn dep sanaidy. Alaida árbir kelesi kezeń EO quramyndaǵy 27 memlekettiń saiasi kelisimin talap etedi.
Altynshy klasterdiń Moldova úshin de ashylatyny habarlandy. Ýkraina men Moldovanyń Eýroodaqqa múshelik protsesteri ózara bailanysty túrde qarastyrylyp keledi.
Ýkraina men Moldova 2022 jyly Reseidiń Ýkrainaǵa keń kólemdi basyp kirýinen keiin Eýropalyq odaqqa múshelikke ótinish bergen.
Alaida Ýkrainanyń kelissóz protsesi Vengriianyń burynǵy premer-ministri Viktor Orbannyń qarsylyǵyna bailanysty eki jylǵa jýyq ýaqyt baiaýlaǵan. Orban Kiev biliginiń Ýkrainanyń batysyndaǵy vengr azshylyǵynyń quqyqtaryna qatysty saiasatyn synǵa alyp, EO keńesindegi sheshimderge tosqaýyl qoiyp kelgen.
Vengriiadaǵy parlament sailaýynan keiin bilikke Peter Madiar bastaǵan jańa úkimet kelgen soń, Ýkraina men Moldovanyń múshelik protsesi qaita jandana bastady. Jańa Vengriia úkimeti ýkrain tarapymen ulttyq azshylyqtardyń quqyqtaryna qatysty daýly máselelerdi retteý boiynsha kelissóz júrgizgen.
Eýroodaqtyń keńeiý máseleleri jónindegi komissary Marta Kos qazirgi saiasi serpindi naqty nátijege ainaldyrý qajettigin aitty.
EO-ǵa kirý protsesinde úmitker memleket odaq zańnamasyna sáikes keletin birneshe ondaǵan baǵyt boiynsha reformalar júrgizýi kerek. Bul baǵyttar alty negizgi kelissóz klasterine biriktirilgen. Barlyq talap oryndalyp, EO-ǵa múshe memleketter kelisim bergen jaǵdaida ǵana eldiń uiymǵa qosylýy múmkin.
