پرەمەر-مينيستر اسقار مامين جۇمىس ساپارىمەن اقتٶبە وبلىسىنا كەلدٸ, دەپ حابارلايدى "ۇلت اقپارات".
ٷكٸمەت باسشىسى الدىمەن «نۇر اقتٶبە» تۇرعىن ٷي كەشەنٸندەگٸ قۇرىلىس جۇمىستارىمەن تانىستى. مۇندا 27 كٶپقاباتتى ٷي سالىنىپ جاتىر. جوسپار بويىنشا بيىل وبلىستا 1 ميلليون شارشى مەتر تۇرعىن ٷي پايدالانۋعا بەرٸلەدٸ.
«جىل سوڭىنا دەيٸن 1400-دەن استام پەتەر «نۇرلى جەر» باعدارلاماسىمەن بەرٸلەدٸ. ال «باقىتتى وتباسى» باعدارلاماسى اياسىندا قالاداعى كٶپبالالى وتباسىعا 40 سەرتيفيكات ٷلەستٸرٸلدٸ. بۇل - العاشقى جارنا بولادى», - دەدٸ قالا ەكٸمٸنٸڭ ورىنباسارى ۇشقىن مىڭباەۆ.
قالا ەكٸمٸ ماۆر ابدۋلليننٸڭ ايتۋىنشا, بيىل بەس مىڭ پەتەر قولدانىسقا بەرٸلەدٸ. ونىڭ ٸشٸندە 30 كٶپقاباتتى ٷي - مەملەكەتتٸك, 31-ٸ - كوممەرتسييالىق.
«ەڭ قيىنى - جەر كەزەگٸ. قازٸر قالا بويىنشا 140 مىڭ ادام جەر الۋعا ٶتٸنٸش بەرگەن. بارلىعى 393 باۋ-باقشا ۇجىمى بار. ونىڭ 40-نا جەر تەلٸمٸ ستاتۋسى بەرٸلٸپ جاتىر. ەندٸ ينفراقۇرىلىمىن جاڭارتۋ قاجەت. سۋ, گاز كەرەك. ولارعا 6,2 ميلليارد تەڭگە قارجى سۇرايمىز. 18 مىڭ جەر تەلٸمٸنە 8 جوبالىق-سمەتالىق قۇجات جاسالدى. مەملەكەت باسشىسىنىڭ قولداۋىمەن باستالعان «باقىتتى وتباسى» باعدارلاماسى بويىنشا 1090 ٶتٸنٸش تٷستٸ. ونىڭ 471-ٸ «تۇرعىن ٷي قۇرىلىس جيناق بانكٸ» ارقىلى تٶلەم قابٸلەتٸن راستادى. بۇعان 2 ميلليارد تەڭگە اقشا بٶلٸنٸپ, يگەرٸلدٸ. تاعى 555 وتباسىنا قارجى سۇرالدى. ونى قىركٷيەكتە يگەرٸپ, تاعى اقشا سۇراعىمىز كەلەدٸ», - دەدٸ ماۆر ابدۋللين.
ايتا كەتەيٸك, قالا بويىنشا كەزەكتە 24 مىڭ ادام پەتەر كەزەگٸندە تۇر. ٷكٸمەت باسشىسى باسپانامەن قامتاماسىز ەتۋ مەسەلەلەرٸنەن حاباردار بولعان سوڭ, قۇرىلىس جۇمىستارىمەن تانىستى.
