نۇر-سۇلتان قالاسى تٶتەنشە جاعدايلار دەپارتامەنتٸ ازاماتتىق قورعاۋ باسقارما باستىعى رەتبەك دەمەۋبەرگەن 30 شٸلدەدە 12 جاستاعى بالانىڭ ٶلٸمٸمەن اياقتالعان قايعىلى وقيعا تۋرالى مەلٸمەت بەردٸ, دەپ حابارلايدى قازاقپارات.
«سوڭعى سۋعا باتۋ وقيعاسى 30 شٸلدەدە تٸركەلدٸ. ٷش كٷن بۇرىن سارايشىق كٶشەسٸ ماڭىندا, «ترياتلون پاركٸ» اۋدانىنداعى كٶپٸردٸڭ استىندا سۋعا شومىلىپ جٷرگەن 2009 جىلعى بالا سۋعا باتىپ كەتتٸ. ول جەرگە بٸزدٸڭ تٶتەنشە جاعداي قىزمەتٸنٸڭ ٶكٸلدەرٸ سۋعا شومىلۋعا بولمايتىنى تۋرالى بەلگٸ قويعانىن ايتۋ كەرەك. 12 جاستاعى جاسٶسپٸرٸم وعان مەن بەرمەي, ارتى قايعىلى اياقتالىپ وتىر. سوندىقتان قالا تۇرعىندارى مەن قوناقتارىن بالالاردى ٶز بەتٸمەن شومىلۋعا جٸبەرمەۋگە شاقىرامىز», - دەدٸ رەتبەك دەمەۋبەرگەن ەكٸمدٸكتٸڭ اقپارات الاڭىندا.
ونىڭ ايتۋىنشا, ماۋسىم باستالعاننان بەرٸ سۋعا شومىلۋ ەرەجەسن ساقتاماعان ادامداردىڭ ٷستٸنەن 285 ايىپپۇل پاراعى تولتىرىلعان.
«بٷگٸنگٸ كٷنٸ شومىلۋ قاۋٸپسٸزدٸگٸ مەن ەرەجەسٸن ساقتاماعان ادامداردىڭ ٷستٸنەن 285 ەكٸمشٸلٸك حاتتاما تولتىرىلدى. حاتتامانى ٸشكٸ ٸستەر ورگانىنىڭ قىزمەتكەرلەرٸ تولتىرادى. ەكٸمشٸلٸك قۇقىق بۇزۋ تۋرالى كودەكستٸڭ 364-بابى بويىنشا 223, 440-بابى بويىنشا 62 ەكٸمشٸلٸك ايىپپۇل سالىندى», - دەگەن تجد ٶكٸلٸ.
