تٷركييادا 23-26 مامىر ارالىعىندا كوممەندانتتىق ساعات ەنگٸزٸلەدٸ, دەپ حابارلايدى "ۇلت اقپارات" انادولى اگەنتتٸگٸنە سلٸتەمە جاساپ.
تٷركييا پرەزيدەنتٸ رەجەپ تايىپ ەردوعان ەلدٸڭ كوروناۆيرۋسپەن قولدان كەلگەنشە كٷرەسٸپ جاتقانىن جەتكٸزدٸ. ونىڭ ايتۋىنشا, ەل بيلٸگٸ 5,5 ملن استام از قامتىلعان حالىققا قارجىلاي كٶمەك كٶرسەتكەن.
تٷرٸك كٶشباسشىسى ازاماتتارعا ەلەۋمەتتٸك اراقاشىقتىقتى ساقتاۋ قاجەتتٸگٸن ەسكە سالدى. ەيتپەسە اۋرۋ قايتا ٶرشيدٸ, ول جاعدايدا شەكتەۋ شارالارىن قايتادان قاتاڭداتۋعا تۋرا كەلەدٸ.
ونىڭ سٶزٸنشە, بيلٸك كوروناۆيرۋستىڭ تارالۋىنا قارسى كومەندانتتىق ساعات ەنگٸزۋدٸ جالعاستىرا بەرەدٸ. مۇنداي شارا 23-26 مامىر ارالىعىندا بٷكٸل ەل اۋماعىندا تاعى ەنگٸزٸلەدٸ. ودان بٶلەك, ەپيدەميياعا بايلانىستى 15 پروۆينتسييادا كٸرٸپ-شىعۋعا قويىلعان شەكتەۋ تاعى 15 كٷنگە ۇزارتىلادى.
«29 مامىردان باستاپ مەشٸتتەردٸڭ جۇمىسى بٸرتٸندەپ قالپىنا كەلە باستايدى. Covid-19 – بٷكٸلەلەمدٸك قاتەر. پروبلەما جاھاندىق دەڭگەيدە شەشٸلگەندە عانا بۇل قاتەردەن قۇتىلامىز», - دەپ اتاپ ٶتتٸ ەردوعان.
ونىڭ ايتۋىنشا, تٷركييا پاندەمييانىڭ اياقتالۋىن كٷتەمٸن دەپ شەكاراسىن تولىق جاۋىپ, كٷندەلٸكتٸ تٸرشٸلٸكتٸ توقتاتىپ قويىپ, جىلدار بويى وتىرا المايدى.
