Túrkiiada 23-26 mamyr aralyǵynda kommendanttyq saǵat engiziledi, dep habarlaidy "Ult aqparat" Anadoly agenttigine sliteme jasap.
Túrkiia prezidenti Rejep Taiyp Erdoǵan eldiń koronavirýspen qoldan kelgenshe kúresip jatqanyn jetkizdi. Onyń aitýynsha, el biligi 5,5 mln astam az qamtylǵan halyqqa qarjylai kómek kórsetken.
Túrik kóshbasshysy azamattarǵa áleýmettik araqashyqtyqty saqtaý qajettigin eske saldy. Áitpese aýrý qaita órshidi, ol jaǵdaida shekteý sharalaryn qaitadan qatańdatýǵa týra keledi.
Onyń sózinshe, bilik koronavirýstyń taralýyna qarsy komendanttyq saǵat engizýdi jalǵastyra beredi. Mundai shara 23-26 mamyr aralyǵynda búkil el aýmaǵynda taǵy engiziledi. Odan bólek, epidemiiaǵa bailanysty 15 provintsiiada kirip-shyǵýǵa qoiylǵan shekteý taǵy 15 kúnge uzartylady.
«29 mamyrdan bastap meshitterdiń jumysy birtindep qalpyna kele bastaidy. Covid-19 – búkilálemdik qater. Problema jahandyq deńgeide sheshilgende ǵana bul qaterden qutylamyz», - dep atap ótti Erdoǵan.
Onyń aitýynsha, Túrkiia pandemiianyń aiaqtalýyn kútemin dep shekarasyn tolyq jaýyp, kúndelikti tirshilikti toqtatyp qoiyp, jyldar boiy otyra almaidy.
