الماتى-قورعاس جولىندا ەكٸ ەيەلدٸڭ كٶلٸكتە تٸرٸدەي ٶرتەنٸپ كەتكەنٸ تۋرالى وقيعانىڭ ۆيدەوسى جارييالاندى, دەپ حابارلايدى "ۇلت اقپارات".
كٶلٸكتٸڭ جانعان سەتٸ كٶمەك كٶرسەتۋ ٷشٸن توقتاعان ماشينانىڭ ۆيدەوتٸركەگٸشٸنە جازىلعان. ۆيدەودان جول جيەگٸندە تۇرعان اۆتوكٶلٸكتٸڭ الدىمەن تٷتٸندەپ, كەيٸن قىزىل جالىنعا ورانعانىن كٶرۋگە بولادى. سول سەتتە ەر ادام كٶلٸكتٸڭ الدىڭعى ەسٸگٸن اشىپ شىعادى. ارتقى ەسٸك اشىلعانىمەن, باسقا ەشكٸم شىعىپ ٷلگەرمەيدٸ, كٶلٸك ٶرتكە ورانادى.
ٶزگە كٶلٸكتٸڭ جٷرگٸزۋشٸسٸ ماشيناسىن بٸردەن توقتاتىپ, ٶرت سٶندٸرەتٸن قۇرىلعىسىن الا جٷگٸرەدٸ. الايدا, جالىندى ٶشٸرۋ مٷمكٸن بولمايدى.
«ەكٸ ەيەل ادام تٸرٸدەي جانىپ كەتتٸ. مەن كٶمەكتەسۋگە بارىنشا تىرىستىم. بٸراق ٶرتتٸ ٶشٸرۋ مٷمكٸن بولمادى», - دەپ جازعان ۆيدەو اۆتورى.
ەستەرٸڭٸزگە سالا كەتەيٸك, 3 ماۋسىم كٷنٸ «الماتى-قورعاس» اۆتوجولىنىڭ 82-شاقىرىمىندا جەڭٸل اۆتوكٶلٸك ٶرتەندٸ. كٶلٸك سالونىندا ەكٸ ەيەل تٸرٸدەي جانىپ كەتتٸ. وقيعا ورنىنان ۆيدەو تٷسٸرگەن كۋەگەرلەردٸڭ سٶزٸنشە, كٶلٸك قىزىل جالىنعا ورانعاندا ولار ٸشٸندە ۇيىقتاپ جاتقان.
ال قۇتقارۋشىلار دەر كەزٸندە وقيعا ورنىنا جەتە الماعان. سەبەبٸ, جاقىن ماڭدا ٶرت سٶندٸرۋ قىزمەتٸ بولماعان. ٶرتتٸڭ شىعۋ سەبەبٸ انىقتالۋدا.
«شاقىرۋ ورنىنا الماتى وبلىسى تجد 4 قىزمەتكەرٸ مەن 1 تەحنيكاسى شىقتى. جانعان جەردەن ٶرت سٶندٸرۋ بٶلٸمٸنە دەيٸن قاشىقتىق 45 كم قۇرادى. ٶرت ورنىندا اۆتوكٶلٸك سالونىندا 2 جولاۋشىنىڭ جانىپ كەتكەن دەنەسٸ تابىلدى»- دەدٸ الماتى وبلىستىق تجد باسپاسٶز قىزمەتٸنٸڭ رەسمي ٶكٸلٸ ازامات جۇرتباەۆ.
