جامبىل وبلىسىندا ٶكپەسٸ 76 پايىز قابىنعان, ەكٸ اپتا بويى جاساندى جەلدەتۋ اپپاراتىمەن دەم العان, كٷردەلٸ جاعدايداعى ناۋقاس ەمدەلٸپ شىقتى, دەپ حابارلايدى قازاقپارات.
65 جاستاعى جامبىل اۋدانىنىڭ تۇرعىنى شٸلدە ايىنىڭ ورتاسىندا جامبىل وبلىستىق كٶپبەيٸندٸ اۋرۋحاناسىنىڭ جۇقپالى اۋرۋلار قۇرىلىمىنا تٷسكەن.
اۋرۋحاناعا تٷسكەن كەزدەگٸ جاعدايى تىم اۋىر ەدٸ. وعان قوسا ناۋقاستا قانت ديابەتٸ, ارتەريالدى گيپەرتەنزييا, تىنىس الۋ جەتٸسپەۋشٸلٸگٸنٸڭ ٸ-دەرەجەسٸمەن قاتار ينتوكسيكاتسييالىق سيندرومنىڭ بولۋىنا بايلانىستى جانساقتاۋ بٶلٸمٸندە باقىلاۋدا بولدى. تٷسكەن كٷننەن باستاپ, تىنىس الۋ جەتٸسپەۋشٸلٸگٸ ٸٸ,ٸٸٸ-دەرەجەگە دەيٸن تٶمەندەپ, جاساندى تىنىس الۋ اپپاراتىنا قوسىلعان.
دەر كەزٸندە جٷرگٸزٸلگەن كەشەندٸ ەمنٸڭ ارقاسىندا پاتسيەنتتٸڭ جاعدايى جاقسارعان. ناۋقاستىڭ ٶمٸرٸن امان الىپ قالۋ ٷشٸن دەرٸگەرلەر ونى ەكٸ اپتا بويى ٷزدٸكسٸز باقىلاۋدا ۇستاپ, تيٸستٸ ەم-شارالار رەتٸن جٷرگٸزٸپ وتىردى. دەگەنمەن, قوسالقى اۋرۋلارى بولعاندىقتان, ەرەڭ ٶزٸنە كەلگەن انا تيٸستٸ مەديتسينالىق شارالار نەتيجەسٸن بەرگەن سوڭ ەسٸن جيىپ, ٶزدٸگٸنەن دەم الۋعا كٶشتٸ.
«جاز مەزگٸلٸ توي مەزگٸلٸ دەمەكشٸ, 4 كٷن قاتارىنان ۇيات بولماسىن دەپ بارعان ەدٸم. بەسٸنشٸ كٷنٸ دەنە قىزۋىم كٶتەرٸلٸپ, ەلسٸزدٸك بويىمدى باسىپ الدى. بۋىندارىم اۋىرا باستادى. ەل سالدىرىپ جاتقان ۆاكتسينانى دا العان جوق ەدٸم. ٷيدەن دەرٸلەر ٸشٸپ, ۋكولدار قابىلدادىم. ٶزدٸگٸنەن جٷرگٸزٸلگەن ەمنەن جاعدايىم جاقسارماعان سوڭ, جەدەل جەردەم شاقىردىم. وسىلايشا اۋرۋىم ودان سايىن اسقىنىپ, جانساقتاۋ بٶلٸمٸنەن بٸر-اق شىقتىم. مۇندا كەلگەندە ەكٸ جاقتى پنەۆمونييا, ٶكپەنٸڭ 76% قابىنۋى دەگەن دياگنوز قويىلدى. ەكٸ جەتٸ ٶكپەنٸ جاساندى جەلدەتۋ اپپاراتىنا قوسۋلى جاتتىم. دەرٸگەرلەردٸڭ كٷش-جٸگەرٸنٸڭ نەتيجەسٸندە قاۋٸپتٸ ۆيرۋستان امان قالدىم. مەنٸ بەيٸندٸ بٶلٸمشەنٸڭ پالاتاسىنا اۋىستىردى, وندا ەمدەۋدٸ جالعاستىردىم. بارشا اق حالاتتىلارعا العىسىمدى بٸلدٸرەمٸن», - دەپ, اۋرۋحانادان شىعاردا اعىنان جارىلدى.
