الماتىدا تولاسسىز جاۋعان جاۋىننان كٶشەلەردٸ سۋ باستى, دەپ حابارلايدى قازاقپارات تٸلشٸسٸ.
سۋ استىندا قالعان كٶشەلەردەگٸ كٶرٸنٸستٸ تۇرعىندار سۋرەتكە, ۆيدەوعا تٷسٸرٸپ, ەلەۋمەتتٸك جەلٸگە سالىپ جاتىر.
تاڭعا جۋىق باستالعان جاڭبىر ەلٸ دە تولاسسىز جاۋىپ تۇر.
اعىن سۋلار ارىقتان اسىپ تروتۋارلارعا جايىلىپ جاتىر. ەسٸرەسە كٶپٸرلەردٸڭ استى مەن سايلاردا سۋ تٸزەگە جەتٸپ قالدى.
جاياۋ جٷرگٸنشٸلەردٸڭ كٶپشٸلٸگٸ سۋ كەشٸپ جٷر. قالانىڭ بٸراز ۋچاسكەسٸندە قوزعالتقىشىنا سۋ تيگەن كٶلٸكتەر توقتاپ تۇر.
«قازگيدرومەت» رمك بولجاۋىنشا, بٷگٸن تٷندە اۋا تەمپەراتۋراسى +11 گرادۋسقا دەيٸن تٷسپەك. جاۋىن-شاشىن ەرتەڭ دە جالعاسۋى مٷمكٸن. اشىق كٷن رايى 11 قىركٷيەك كٷنٸ عانا كٷتٸلەدٸ.
قالالىق تٶتەنشە جاعدايلار دەپارتامەنتٸ سينوپتيكتەردٸڭ ەسكەرتۋٸنە بايلانىستى حابارلاندىرۋ تاراتىپ جاتىر. «10-11 قىركٷيەك ارالىعىندا الماتى قالاسىنا جاقىن ورنالاسقان اۋماقتاردا نٶسەرلٸ جاڭبىردىڭ بولجانۋىنا بايلانىستى, كەي جەرلەردە قاتتى اعىندار قالىپتاسىپ, تاۋ ٶزەندەرٸندە سۋ دەڭگەيٸ كٶتەرٸلۋٸ مٷمكٸن», - دەلٸنگەن حابارلامادا
