مىسىر تاراپىنىڭ باستاماسىمەن ۇيىمداستىرىلعان جوعارى دەڭگەيدەگٸ سۇحبات بارىسىندا مەملەكەتتەر باسشىلارى ەكٸجاقتى قاتىناستاردىڭ قازٸرگٸ جاعدايى مەن پەرسپەكتيۆالارىن تالقىلادى, دەپ حابارلايدى اقوردا.
قاسىم-جومارت توقاەۆ قازاق-مىسىر قاتىناستارىنىڭ تامىرى تەرەڭ بولعانىمەن, ەكٸ ەل اراسىنداعى زاماناۋي ديپلوماتييالىق قاتىناستاردىڭ ورناعانىنا بيىل 30 جىل عانا تولعانىن اتاپ ٶتتٸ. وسى مەرزٸم ٸشٸندە ەكٸجاقتى ىنتىماقتاستىقتىڭ ەرتٷرلٸ سالاسى بويىنشا بٸرقاتار جەتٸستٸكتەرگە قول جەتكٸزٸلدٸ. دەگەنمەن, بٷگٸنگٸ تاڭدا ەكٸ ەل اراسىنداعى بايلانىستارىنىڭ ەلەۋەتٸ تولىق پايدالانىلماي وتىرعانىنا نازار اۋدارعان قازاقستان پرەزيدەنتٸ مىسىر تاراپىن ساۋدا-ەكونوميكا سالاسىنداعى ىقپالداستىقتى دامىتۋعا شاقىردى.
سونىمەن قاتار, مەملەكەت باسشىسى قاڭتار وقيعالارىنا قاتىستى الاڭداۋشىلىق تانىتىپ, نيەتتەستٸك بٸلدٸرگەنٸ ٷشٸن ەبدەل فاتتاح اس-سيسي مەن مىسىر حالقىنا العىسىن جەتكٸزدٸ.
قاسىم-جومارت توقاەۆ ەلٸمٸزدەگٸ جاعدايدىڭ تۇراقتالعانىن اتاپ ٶتٸپ, ەلەۋمەتتٸك-ەكونوميكالىق قايتا قۇرۋدىڭ جاڭا ستراتەگيياسىن جٷزەگە اسىرۋ شارالارى قابىلدانعانىنا توقتالدى. پرەزيدەنتتٸڭ ايتۋىنشا, قازاقستان حالقى بولاشاققا نىق سەنٸممەن قارايدى.
سۇحبات سوڭىندا مەملەكەت باسشىسى مىسىر پرەزيدەنتٸن قازاقستانعا ٶزٸنە قولايلى مەرزٸمدە ساپارمەن كەلۋگە شاقىردى.
