فوتو: اشىق دەرەككٶز
مەملەكەت باسشىسى Astana Team بالالار حوككەي كومانداسىن كانادادا ٶتكەن Quebec International Pee-Wee Hockey Tournament حالىقارالىق تۋرنيرٸندە جەڭٸسكە جەتۋٸمەن قۇتتىقتادى, دەپ حابارلايدى Ult.kz.
پرەزيدەنت قازاقستاندىق كلۋبتىڭ سەنساتسييالىق جەتٸستٸگٸ وتاندىق سپورتتاعى ايتۋلى وقيعا ەكەنٸن اتاپ ٶتتٸ.
قاسىم-جومارت توقاەۆ جوعارى شەبەرلٸك پەن جەڭٸسكە دەگەن ايرىقشا جٸگەر تانىتقان جاس سپورتشىلارعا ريزاشىلىعىن بٸلدٸردٸ. مەملەكەت باسشىسى فينالدا حوككەيدٸڭ وتانى سانالاتىن كانادالىق قارسىلاستاردان باسىم تٷسكەن ٶرەندەردٸڭ تاباندىلىعى مەن كەسٸبيلٸگٸنە ەرەكشە توقتالدى.
پرەزيدەنت جاس حوككەيشٸلەردٸڭ الداعى ۋاقىتتا دا تىنىمسىز جاتتىعىپ, شەبەرلٸكتەرٸن شىڭداپ, بۇدان دا بيٸك بەلەستەردٸ باعىندىراتىنىنا سەنٸم بٸلدٸرٸپ, ولارعا سەتتٸلٸك تٸلەدٸ.
ايتا كەتەيٸك, قازاقستاندىق Astana Team كومانداسى كانادادا ٶتكەن Quebec International Pee-Wee Hockey Tournament حالىقارالىق تۋرنيرٸنٸڭ اا Elite ديۆيزيونىندا جەڭٸمپاز اتاندى.
جارىسقا 2013 جىلى تۋعان جاسٶسپٸرٸمدەر قاتىستى. Astana Team قۇرامىندا ٶزگە كلۋبتاردىڭ ويىنشىلارى دا بولدى: تورپەدو (ٶسكەمەن), حك استانا, يۋنوست (قاراعاندى) جەنە تايگەرس (الماتى).
قازاقستاندىق حوككەيشٸلەر التى ماتچ ٶتكٸزٸپ, بارلىعىندا جەڭٸسكە جەتتٸ. جالپى ەسەپ – 21:11. تۋرنيرگە 20 ەلدٸڭ كوماندالارى قاتىستى. وسىلايشا, قازاقستان جارىس تاريحىندا چەمپيون اتانعان بەسٸنشٸ ەل بولدى. بۇعان دەيٸن بۇل جەتٸستٸككە كانادا, اقش, رەسەي, فينلياندييا, شۆەتسييا جەنە چەحييا قۇرامالارى عانا قول جەتكٸزگەن.
