قازاقستاننىڭ بٸرٸنشٸ, ەلەمنٸڭ 18-راكەتكاسى ەلەنا رىباكينا ستراسبۋرگ (فرانتسييا) WTA تۋرنيرٸنٸڭ جارتىلاي فينالىنا شىقتى, دەپ حابارلايدى "ۇلت اقپارات".
وسى جارىستىڭ 5-راكەتكاسى بولىپ تٸركەلگەن قازاقستاندىق تەننيسشٸ شيرەك فينالدا ەلەمدٸك رەيتينگتە 40-ورىندا تۇرعان قىتايلىق چجان شۋايمەن كەزدەستٸ.
بٸرٸنشٸ پارتييادا ە.رىباكينا 5:2 ەسەبٸمەن العا كەتتٸ. سول باسىمدىلىقتى ۋىسىنان شىعارعان جوق – 6:3.
ەكٸنشٸ سەتتە دە قازاقستاندىق تەننيسشٸ برەيكپەن العا شىقتى – 2:1. تاعى بٸر برەيك – 4:1. بۇدان كەيٸن قىتايلىق سپورتشى برەيك جاساپ, ەسەپتٸ قىسقارتا الدى – 2:4. دەگەنمەن ٸلە-شالا قايىرا برەيك جاساعان ەلەنا ەسەپتٸ 5:2-گە جەتكٸزدٸ. اقىرى ول ماتچقا دوپ بەرگەندە, مٷمكٸندٸگٸن مٷلت جٸبەرمەدٸ – 6:2.
بەسەكە تۋرا بٸر ساعاتقا سوزىلدى.
ە.رىباكينا فينالعا شىعۋ ٷشٸن ەلەمنٸڭ 84-راكەتكاسى, جاپونييالىق ناو حيبينومەن تالاسادى.
ن.حيبينو شيرەك فينالدا رولان گارروس تۋرنيرٸنٸڭ 2017 جىلعى جەڭٸمپازى, قازٸر ەلەمنٸڭ 43-راكەتكاسى, لاتۆييالىق ەلەنا وستاپەنكونى 7:6 (7:2), 7:6 (7:4) ەسەبٸمەن تٸزە بٷكتٸردٸ. ونىڭ الدىندا جاپونييالىق سپورتشى زارينا ديياستى دا ۇتىپ كەتكەن بولاتىن. ەندٸ ە. رىباكينا سونىڭ ەسەسٸن قايتارا الا ما, ونى الداعى ويىن كٶرسەتەدٸ.
