قازاقستاندىق الەكساندر نەدوۆەسوۆ ۋكراينالىق دەنيس مولچانوۆپەن بٸرگە جۇپتىق سىندا انتالييا 2 چەللەندجەر تۋرنيرٸنٸڭ جەڭٸمپازى اتاندى, دەپ حابارلايدى "ۇلت اقپارات".
قازاقستاندىق-ۋكراينالىق جۇپ فينالدا امەريكالىقتار روبەرت گەللوۋەي - الەكس لوۋسونمەن باس جٷلدەنٸ ساراپقا سالدى.
بۇدان بۇرىن انتالييادا ٶتكەن دەل وسىنداي جارىستا ا.نەدوۆەسوۆ پەن د.مولچانوۆ جۇبى چەمپيون اتانعان بولاتىن. سول دودانىڭ باستاپقى كەزدەسۋٸندە ولار امەريكالىق جۇپتى ەكٸ سەتتە ۇتقان ەدٸ.
بۇل جولى بٸرٸنشٸ پارتييادا توعىزىنشى گەيمدە نەدوۆەسوۆ پەن مولچانوۆ برەيك جاساي الدى - 6:4.
ەكٸنشٸ سەتتە قارسىلاستار برەيكپەن الماسىپ, كەزدەسۋ تاعدىرى تاي-برەيكتە قازاقستاندىق-ۋكراينالىق جۇپتىڭ پايداسىنا شەشٸلدٸ - 7:6 (7:2).
بەسەكە 1 ساعات 20 مينۋتقا سوزىلدى.
وسىلايشا نەدوۆەسوۆ پەن مولچانوۆ انتالييادا قاتارىنان ەكٸ تۋرنيردە جەڭٸمپاز اتاندى. بۇل قازاقستاندىق تەننيسشٸنٸڭ چەللەندجەر جارىستارىنداعى 17-ٸنشٸ جەڭٸسٸ ەدٸ.
