تالدىقورعاندا كوللەدج عيماراتىنىڭ 3-قاباتتاعى تەرەزەسٸنەن قۇلاعان ستۋدەنت العاشقىدا ٶزٸنٸڭ اۋىرىپ تۇرعانىن ايتىپ شاعىمدانعان, دەپ حابارلايدى "ۇلت اقپارات".
«تاريح پەنٸ بولاتىن. جاڭاعى ستۋدەنت ٶزٸن جايسىز سەزٸنٸپ تۇرعانىن ايتتى. مۇعالٸم مەدبيكەگە بار دەپ ەسكەرتكەن. بٸراق ستۋدەنت قىز بارماعان. قىز بارمايمىن دەگەن سوڭ مۇعالٸم باسقا وقۋشىنى مەدبيكەنٸ شاقىرىپ كەلۋگە جۇمساعان. مەدبيكە كەلگەنشە ستۋدەنتتەر مەن مۇعالٸم ساباعىن ەرٸ قاراي جالعاستىرا بەرگەن. سول كەزدە جاڭاعى اۋىرىپ وتىرعان ستۋدەنت تەرەزەدەن سەكٸرٸپ كەتكەن», - دەيدٸ تالدىقورعانداعى گۋمانيتارلىق كوللەدج ديرەكتورىنىڭ ورىنباسارى باقىت سامالباەۆ.
ونىڭ ايتۋىنشا, ستۋدەنتتٸڭ قۇلاعان سەتٸ كوللەدج عيماراتىنداعى بەينەكامەراعا تٷسٸپ قالعان.
بۇل ايعاقتى تەرگەۋشٸلەر ٸسكە تٸركەپ, قازٸر «ٶزٸنە قول جۇمساۋعا يتەرمەلەۋ» بابى بويىنشا سوتقا دەيٸنگٸ تەرگەۋ جٷرٸپ جاتىر.
ەستەرٸڭٸزگە سالا كەتەيٸك, بۇعان دەيٸن 17 جاستاعى ستۋدەنت قىزدىڭ 3-قاباتتاعى تەرەزەدەن قۇلاپ كەتكەنٸن حابارلاعان بولاتىنبىز.
