سىرىمبەك تاۋ: "بالىق بەرمە, قارماق بەر" دەپ باستالاتىن حاتتاردى وقىمايمىن

فوتو: Massaget.kz

بەلگٸلٸ كەسٸپكەر سىرىمبەك تاۋ ەلەۋمەتتٸك جەلٸدەگٸ پاراقشاسىندا كٷندەلٸكتٸ وعان كەلەتٸن حاتتار مەن ٶتٸنٸشتەر تۋرالى اشىق وي قالدىرىپ, وقىرماندارىنا ماڭىزدى ۇيعارىم ايتتى, دەپ حابارلايدى Ult.kz.

ول جازباسىندا قىسقا ەرٸ نۇسقا تٷردە كەلەسٸنٸ اتاپ ٶتكەن:

«تٸزەسٸ شىققان سٶز. “بالىق بەرمە, قارماق بەر”. وسىلاي باستالسا وقىماۋعا تىرىسامىن. وسىلاي كٷنٸنە 8–9 ادام جازادى. بٸر دەمەپ جٸبەرسەڭ, بايىپ كەتەمٸن, كرەديتٸمدٸ جاۋىپ بەرسەڭ, جولىم بولىپ كەتەدٸ… قاتەلەسٸپ قۇمار ويىنعا كٸرٸپ, ٶلٸم شەگٸنە كەلگەندەي بولىپ جازاتىندار دا, سٸز قۇتقاراسىز, تٷسٸمدە سٸزدٸ كٶردٸم — سٸز كٶمەكتەسۋٸڭٸز كەرەك ەكەنسٸز دەپ جازادى… وسىنداي, قاراجات سۇراپ جازاتىن, ەش تانىس ەمەس ادامدار كٶپ. دوستار, تەگٸن دٷنيە بولمايدى; بولسا دا نەتيجە بەرەتٸن, پاراساتتى, پايدالى بولعاندا عانا بولادى. سوندىقتان 50–60 ادامعا بٸردەي حات جازىپ, ۋاقىت جوعالتقانشا, 20 بەت كٸتاپ وقىڭىز نەمەسە ەكٸ قولعا بٸر كٷرەك تاباتىن جۇمىس تابىڭىز. اسپاننان اقشا جاۋمايدى — بۇل انىق.»

كەسٸپكەردٸڭ سٶزٸ وقىرماندارى اراسىندا ەكۇشتى پٸكٸر تۋدىردى. بٸرٸ ونى قولداسا, باسقالارى اقشالى ادام مۇنداي مۇقتاجدىقتى تٷسٸنە بەرمەيتٸنٸن جەتكٸزدٸ.

"قازٸرگٸ زاماندا ەرتٷرلٸ قيىندىقپەن بەتپە-بەت كەلەتٸن ادامدار كٶپ. كەيبٸرەۋلەر, شىن مۇقتاجدىقپەن ەمەس, ەلدەبٸر جەڭٸل جول ٸزدەپ, كٶمەكتٸ سۇراۋعا جٷگٸنەدٸ. كٶمەك سۇراعان ادامعا قول ۇشىن سوزۋ — ادامگەرشٸلٸك ٸسٸ, بٸراق كٶمەكتٸڭ مەنٸ — ادامنىڭ ٶمٸرٸن ٶزگەرتۋگە ىقپال ەتۋٸندە. قارماق ۇستاپ ٷيرەنبەي, بالىق الۋ مٷمكٸن ەمەس. ەڭبەك پەن بٸلٸم - ادامدى جەتٸستٸككە جەتكٸزەر ەڭ سەنٸمدٸ جول", - دەپ جازدى اكتەر بەكجان تۇرىس.

"سەن نە جازساڭ دا, سٶزٸڭ ٶتٸمدٸ بولادى, قۇرداس. سەبەبٸ سەنٸڭ قاراجاتىڭ بار. قاراجاتى بار ادامنىڭ سٶزٸ, قازاق قوعامىندا ٶتٸمدٸ - قاراجاتى جوق ادامنىڭ باسى التىن بولسا دا, پٸكٸرٸن ەشكٸم تىڭدايمايدى. شىندىق سول. جالپى باي ادامنىڭ اقىل ايتقاندارى دۇرىس. كەدەي ادام اقىل ايتسا: “ٶزٸن جٶندەپ الماي ما …” دەيدٸ قوعام. سوندىقتان وسىلاي اۋقاتتى عۇمىرىڭدا اقىلىڭدى ايتا بەر. تىڭدايمىز", - دەپ جازدى دەپۋتات سامات نۇرتازا.