قازاقستان قۇراماسىنىڭ باس باپكەرٸ ستانيمير ستويلوۆ جانكٷيەرلەردٸ ەۋروكۋبوك تۋرنيرلەرٸنٸڭ جاۋاپتى ماتچتارىندا «استانا» مەن «قايرات» كوماندالارىنا قولداۋ كٶرسەتۋگە شاقىردى, دەپ حابارلايدى "ۇلت اقپارات" قازاقستان فۋتبول فەدەراتسيياسىنىڭ سايتىنا سٸلتەمە جاساپ.
«ەۋروپالىق تۋرنير ٷشٸنشٸ بٸلٸكتٸلٸك كەزەڭدەرٸنٸڭ العاشقى ماتچتارىنىڭ نەتيجەسٸ بويىنشا, «استانا» مەن «قايرات» قارسىلاستارىنان جەڭٸلٸس تاپتى. زاماناۋي فۋتبولدا بارلىعى دا مٷمكٸن, سوندىقتان «استانانىڭ» دا, «قايراتتىڭ» دا جاۋاپتى كەزدەسۋلەردە جاقسى نەتيجە كٶرسەتۋگە مٷمكٸندٸكتەرٸ بار.
كەلەسٸ اپتادا ەكٸ كلۋبىمىز دا بار كٷشٸن سالىپ, سوڭىنا دەيٸن بەرٸسپەيتٸندەرٸنە سەنٸمدٸمٸن. الايدا «استانا» مەن «قايراتتىڭ» قارسىلاستارى وسال ەمەس ەكەنٸن ۇمىتپاۋ كەرەك. العاشقى ماتچتار بۇعان دەلەل. دەگەنمەن, «قايرات» پەن «استانا» ەكٸ ماتچتىڭ نەتيجەسٸ بويىنشا ارى قاراي ٶتەدٸ دەپ سەنەمٸن. قوس كلۋتىڭ بارلىق جانكٷيەرٸن فۋتبولشىلارىمىزعا قولداۋ كٶرسەتٸپ, سەنٸمدەرٸن جوعالتپاۋلارىن سۇرايمىن!», - دەدٸ ستويلوۆ.
ەسكە سالايىق, «استانا» كومانداسى چەمپيوندار ليگاسىنىڭ ٷشٸنشٸ ٸرٸكتەۋ كەزەڭٸندە ٶز الاڭىندا زاگرەبتٸك «ديناموعا» جەڭٸستٸ بەرگەن ەدٸ. الماتىلىق «قايرات» ەۋروپا ليگاسىنىڭ دەل وسىنداي كەزەڭٸندە چەحييالىق «سيگمادان» جەڭٸلٸپ قالدى. جاۋاپ ماتچتار كەلەسٸ اپتادا ٶتەدٸ.
