پەتروپاۆل قالاسىنىڭ تۇرعىندارى, قوعامدىق ۇيىم ٶكٸلدەرٸ ساياسي قۋعىن-سٷرگٸن بوزداقتارىن ەسكە الۋ رەسٸمٸن پوگودين اتىنداعى ورىس دراما تەاترى جانىنداعى سكۆەرگە گٷل شوقتارىن قويۋدان باستادى.
ازالى مۋزىكا وينالىپ, بٸر مينۋتتىق ٷنسٸزدٸك جارييالاندى. جۇرتشىلىق الدىندا وبلىستىق مەسليحاتتىڭ حاتشىسى ۆلاديمير بۋبەنكو سٶز سٶيلەپ, ەلباسى نۇرسۇلتان نازارباەۆتىڭ جارلىعىمەن 31 مامىر ساياسي قۋعىن-سٷرگٸن قۇرباندارىن ەسكە الۋ كٷنٸ بولىپ بەلگٸلەنگەنٸن, قىزىلجار ٶڭٸرٸنەن 7614 ادامنىڭ «حالىق جۋى» اتانىپ, تٷرلٸ جازالاۋلارعا ۇشىراعانىن جەتكٸزدٸ. ولاردىڭ اراسىندا ٷكٸلٸ ىبىراي, ماعجان جۇماباەۆ, سماعۇل سەدۋاقاسوۆ, نىعمەت سىرعابەكوۆ, قايسار تەشيتوۆ, عابباس توعجانوۆ, جۇماعالي تٸلەۋسين سەكٸلدٸ ەلگە بەلگٸلٸ جەرلەستەرٸمٸز بار.
«ٶڭٸردە «پاميات» قوعامدىق قورى 14 جىلدان بەرٸ جۇمىس ٸستەپ كەلەدٸ. ونىڭ باستاماسىمەن جازىقسىز جاپا شەككەن ارىستارىمىزدىڭ ەسٸمدەرٸ جازىلعان مەموريالدىق تاقتا, باسقا رەسپۋبليكالاردان كٷشتەپ قونىس اۋدارىلعاندار مەن اشتىقتىڭ ازابىن تارتقاندارعا ارناپ ەسكەرتكٸش ورناتىلدى. ناق وسى جەردە نكۆد-نىڭ ەكٸ قاباتتى عيماراتى بولىپ, تۇتقىنعا الىنعان جەرلەستەرٸمٸز وسىندا اۋىر ازاپ شەككەن.
بولاشاقتا مۋزەي اشۋدى جوسپارلاپ وتىرمىز. ونداعى ماقسات – اتا-بابا رۋحىنا تاعزىم ەتۋ, تاريحىمىزدىڭ قارالى كەزەڭٸن ۇمىتپاۋ, جاستاردىڭ ەسٸنە سالۋ», دەيدٸ «پاميات» قوعامدىق قورىنىڭ تٶراعاسى ساعىندىقوۆ بولات اقساقال.
ٶمٸر ەسقالي,
