سولتٷستٸك قازاقستان وبلىسىندا ٷلكەن ساۋدا ورىندارىنىڭ كٸرەبەرٸستەرٸنە تەپلوۆيزورلار قويىلىپ جاتىر. دەنە قىزۋى بار تۇرعىن سۋپەرماركەتكە كٸرگٸزٸلمەيدٸ, دەپ حابارلايدى "ۇلت اقپارات".
سقو ەكٸمٸ قۇمار اقساقالوۆ ٶڭٸردە قاۋٸپتٸ ٸندەتتٸڭ تارالۋىنا توسقاۋىل قويۋ ماقساتىندا قولعا الىنعان ٸس-شارالار جٶنٸندە باياندادى.
«وبلىستا كەشە بٸر ادام ەمدەلٸپ, ٷيٸنە جٸبەرٸلدٸ. قازٸر اۋرۋحانادا 24 ناۋقاس بار, جاعدايلارى بٸرقالىپتى. ارالارىندا اۋىر ناۋقاستار جوق.
دەگەنمەن, 10 ورىنعا ارنالعان جانساقتاۋ بٶلٸمشەسٸن دايىنداپ قويدىق. ولارعا جاساندى تىنىس الۋ اپپاراتىنىڭ 10-ىن ەزٸرلەدٸك. جۋىردا جاڭا 5 اپپارات الدىق. بارلىعى وبلىس بويىنشا 74 اپپارات بار. دەرٸگەرلەرٸمٸز ٷلكەن جۇمىس اتقارۋدا. ولارعا العىسىمدى بٸلدٸرەمٸن. ناۋقاستاردى ەمدەيتٸن دەرٸگەرلەر جۇمىستان كەيٸن بٸردەن قوناق ٷيگە جەتكٸزٸلەدٸ. دالاعا شىقپايدى, ٷيلەرٸنە بارمايدى. قوناق ٷيدە دەرٸگەرلەرگە بارلىق جاعداي جاسالعان», - دەدٸ دەدٸ وبلىس ەكٸمٸ «QYZYLJAR» تەلەارناسىنىڭ تٸكەلەي ەفيرٸندە.
وبلىستا شەكتەۋ شارالارى قاتاڭداتىلدى. تٶتەنشە جاعداي رەجيمٸن بۇزۋدىڭ 88 دەرەگٸ انىقتالدى. ونىڭ 42-سٸندە تۇرعىندار قوعامدىق ورىنداردا قىدىرىپ جٷرگەن. 23-ٸ قامالىپ, 32-سٸنە ايىپپۇل سالىندى. تاعى 32-سٸنٸڭ ٸسٸ ەكٸمشٸلٸك سوتقا جٸبەرٸلدٸ.
«بۇعان دەيٸن ەسكەرتتٸك, ەندٸ قاتاڭ شارا قولدانامىز. قازٸر ساياجايعا بارىپ, يتتٸ قىدىرتاتىن ۋاقىت ەمەس. وتباسىلارىڭىزبەن بٸرگە بولىڭىزدار. زەينەتكەرلەرٸمٸزگە ۆيرۋس قاۋٸپتٸ ەكەنٸن ايتساق تا, كٶشەدە جٷرگەن قارتاردى كٶرەمٸز. ايىپپۇل تٶلەگٸلەرٸڭٸز كەلمەسە ٷيدە وتىرىڭىزدار», - دەدٸ قۇمار اقساقالوۆ.
پەتروپاۆلداعى كەسٸپورىن-مەكەمەلەرگە, ٸرٸ ساۋدا ورىندارىنا تەپلوۆيزورلار قويىلىپ جاتىر. ٶڭٸر باسشىسىنىڭ ايتۋىنشا, دەنە قىزۋى بارلار سۋپەرماركەتكە كٸرە المايدى. مۇنداي جاعدايدا ازىق-تٷلٸكتٸ ٷيگە جەتكٸزۋگە تاپسىرىس بەرەدٸ نەمەسە ۆولونتەرلەردٸڭ كٶمەگٸنە جٷگٸنۋگە بولادى.
ال «رادۋگا» جشس دەزينفەكتسييالىق تۋننەلدەردٸ جاساۋدى قولعا الدى. سۋپەرماركەتتەردٸڭ الدارىنا ورناتىلىپ جاتقان قۇرىلىمدار كٸرگەن ادامعا پرەپاراتتى اۆتوماتتى تٷردە سەۋٸپ, دەزينفەكتسييالايدى.
