سولتٷستٸك قازاقستان وبلىسىندا ەكٸ جٸگٸت ەسٸل ٶزەنٸنە باتىپ بارا جاتقان ەر ادامدى الىپ شىعىپ, ٶمٸرٸنە اراشا تٷستٸ, دەپ حابارلايدى "ۇلت اقپارات".
سقو تٶتەنشە جاعدايلار دەپارتامەنتٸ باسپاسٶز قىزمەتٸنٸڭ مەلٸمەتٸنشە, وقيعا 27 ماۋسىم كٷنٸ قىزىلجار اۋدانىنىڭ نوۆونيكولسكوە ەلدٸ مەكەنٸندە بولعان. ەسٸل ٶزەنٸنە سۋعا شومىلۋعا بارعان 50 جاستاعى تۇرعىن سۋعا باتىپ كەتكەن. ونى سول ماڭدا جٷرگەن ەكٸ جٸگٸت بايقاپ قالادى.
«ەر ادام سٷڭگٸگەندەي بولدى, بٸراق سۋ بەتٸنە شىقپادى. بٸردەن كٶمەككە ۇمتىلدىق. ونى بٸرٸنشٸ بولىپ ەۆگەنيي تاپتى. ەكەۋلەپ جاعاعا سٷيرەپ شىعاردىق. ەر ادامدا تٸرشٸلٸك بەلگٸسٸ بولمادى, كٶگەرە باستادى. العاشقى مەديتسينالىق كٶمەك كٶرسەتٸپ, جاساندى دەم العىزدىق», - دەيدٸ نوۆونيكولسكوە ەلدٸ مەكەنٸنٸڭ تۇرعىنى دەنيس الەتسكيي.
جٸگٸتتەردٸڭ قاسىندا بولعان بويجەتكەن دە ۋاقىت وزدىرماي «112» قىزمەتٸنە حابارلاسىپ, بولعان جايتتى ايتقان. قۇتقارۋشىلار اۋىلدىق وكرۋگ ەكٸمٸنە بايلانىسىپ, ول ٶز كەزەگٸندە وقيعا ورنىنا جەدەل جەردەم قىزمەتٸن جٸبەردٸ.
مەديتسينا قىزمەتكەرلەرٸ زارداپ شەگۋشٸنٸ قاراپ, وبلىستىق اۋرۋحاناعا جەتكٸزدٸ. قازٸر ەر ادامنىڭ جاعدايى قالىپتى, ەم الىپ جاتىر.
ال ونىڭ قۇتقارۋشىلارى نوۆونيكولسكوە اۋىلىنىڭ 37 جاستاعى تۇرعىنى دەنيس الەتسكيي مەن بولشايا مالىشكا ەلدٸ مەكەنٸنٸڭ 31 جاستاعى تۇرعىنى ەۆگەنيي وسيپوۆكە باستارىن قاتەرگە تٸگٸپ, سۋعا كەتكەن ەر ادامدى الىپ شىققاندارى ٷشٸن سقو تجد العىس بٸلدٸردٸ.
