Soltústik Qazaqstan oblysynda eki jigit Esil ózenine batyp bara jatqan er adamdy alyp shyǵyp, ómirine arasha tústi, dep habarlaidy "Ult aqparat".
SQO Tótenshe jaǵdailar departamenti baspasóz qyzmetiniń málimetinshe, oqiǵa 27 maýsym kúni Qyzyljar aýdanynyń Novonikolskoe eldi mekeninde bolǵan. Esil ózenine sýǵa shomylýǵa barǵan 50 jastaǵy turǵyn sýǵa batyp ketken. Ony sol mańda júrgen eki jigit baiqap qalady.
«Er adam súńgigendei boldy, biraq sý betine shyqpady. Birden kómekke umtyldyq. Ony birinshi bolyp Evgenii tapty. Ekeýlep jaǵaǵa súirep shyǵardyq. Er adamda tirshilik belgisi bolmady, kógere bastady. Alǵashqy meditsinalyq kómek kórsetip, jasandy dem alǵyzdyq», - deidi Novonikolskoe eldi mekeniniń turǵyny Denis Aletskii.
Jigitterdiń qasynda bolǵan boijetken de ýaqyt ozdyrmai «112» qyzmetine habarlasyp, bolǵan jaitty aitqan. Qutqarýshylar aýyldyq okrýg ákimine bailanysyp, ol óz kezeginde oqiǵa ornyna jedel járdem qyzmetin jiberdi.
Meditsina qyzmetkerleri zardap shegýshini qarap, oblystyq aýrýhanaǵa jetkizdi. Qazir er adamnyń jaǵdaiy qalypty, em alyp jatyr.
Al onyń qutqarýshylary Novonikolskoe aýylynyń 37 jastaǵy turǵyny Denis Aletskii men Bolshaia Malyshka eldi mekeniniń 31 jastaǵy turǵyny Evgenii Osipovke bastaryn qaterge tigip, sýǵa ketken er adamdy alyp shyqqandary úshin SQO TJD alǵys bildirdi.
