سولتٷستٸك قازاقستان وبلىسىندا 36 جاستاعى بٸرگە تۇراتىن ەيەلٸن ٶلٸمشٸ ەتٸپ ساباعان 52 جاستاعى ەر ادامدى پوليتسەيلەر ۇستادى, دەپ حابارلايدى "ۇلت اقپارات".
سقو پوليتسييا دەپارتامەنتٸ باسپاسٶز قىزمەتٸنٸڭ مەلٸمەتٸنشە, 16 اقپان كٷنٸ اققايىڭ اۋداندىق اۋرۋحاناسىنا كٶپتەگەن دەنە جاراقاتتارىمەن 1984 جىلى تۋعان سميرنوۆو ەلدٸمەكەنٸنٸڭ تۇرعىنى جاتقىزىلدى. ونى بٸرگە تۇراتىن ەر ادامنىڭ ٶلٸمشٸ ەتٸپ ساباعانى بەلگٸلٸ بولدى.
اتالعان فاكتٸ «دەنساۋلىققا قاساقانا اۋىرلىعى ورتاشا زييان كەلتiرۋ» بابى بويىنشا سوتقا دەيٸنگٸ تەرگەپ-تەكسەرۋلەردٸڭ بٸرىڭعاي تٸزٸلٸمٸنە ەنگٸزٸلدٸ.
سوتقا دەيٸنگٸ تەرگەۋ بارىسىندا وقيعانىڭ مەن-جايى انىقتالدى. ياعني بٸرگە تۇراتىن ەكەۋدٸڭ اراسىنداعى جانجال 13 اقپان ساعات 19.00 شاماسىندا تۋعان. ۇرىستىڭ ارتى تٶبەلەسكە ۇلاسىپ, 1968 جىلى تۋعان اۋدان ورتالىعىنىڭ تۇرعىنى ٶز ٷيٸندە 36 جاستاعى ەيەلدٸ ۇرعان. جاراقات العان ەيەل دەرٸگەرلەردٸ شاقىرماي تانىسىنىڭ ٷيٸندە ەكٸ تەۋلٸك جاتىپ قالعان. جەبٸرلەنۋشٸنٸڭ اناسى جٷگٸنگەن سوڭ عانا, پوليتسييا قىزمەتكەرلەرٸ مەديتسينالىق كٶمەككە مۇقتاج ەيەلدٸ انىقتادى. ول اۋداندىق اۋرۋحانانىڭ حيرۋرگييا بٶلٸمشەسٸنە جاتقىزىلدى.
20 اقپان كٷنٸ جەبٸرلەنۋشٸ العان جاراقاتتارىنان اۋرۋحانادا كٶز جۇمدى. وسىعان بايلانىستى پوليتسييا قىلمىستىق ٸستٸ «دەنساۋلىققا قاساقانا اۋىر زييان كەلتiرۋ» بابى بويىنشا ٶزگەرتتٸ.
كٷدٸكتٸ ەر ادام ۇستالىپ, اققايىڭ اۋدانى پوليتسييا بٶلٸمٸنٸڭ ۋاقىتشا ۇستاۋ يزولياتورىنا قامالدى. وعان قاتىستى «قاماۋدا ۇستاۋ» بۇلتارتپاۋ شاراسى قابىلداندى.
