شىعىس قازاقستان وبلىسىنىڭ تارباعاتاي اۋدانىندا نٶسەر جاۋىن سالدارىنان ٷيلەردٸ سۋ باستى, دەپ حابارلايدى "ۇلت اقپارات" وبلىستىق تٶتەنشە جاعدايلار دەپارتامەنتٸنە سٸلتەمە جاساپ.
19 شٸلدەنٸڭ كەشٸندە تارباعاتاي اۋدانىنىڭ جاڭااۋىل اۋىلىندا نٶسەر جاۋىن بولىپ, سالدارىنان 10 تۇرعىن ٷيدٸ سۋ باستى. اۋىلداعى سۋ دەڭگەيٸ شامامەن 20 سانتيمەتردٸ قۇراعان.
سۋ باسقاننان كەيٸن ٷش شارۋاشىلىق قۇرىلىستىڭ سامان قابىرعالارى جارىم-جارتىلاي بۇزىلعان. سۋ باسقان ٷيلەردٸڭ تۇرعىندارى – 20 ادام تۋىستارىنىڭ ٷيٸنە جايعاستىرىلدى.
اۋداندىق ٶرت سٶندٸرۋ قىزمەتكەرلەرٸ سۋدى موتوسورعىنىڭ كٶمەگٸمەن تارتىپ الدى. بارلىعى 7000-عا جۋىق تەكشە مەتر سۋ سورىپ الىنعان.
قازٸرگٸ كەزدە ٷيلەردەن سۋ كەتتٸ. كوميسسييا كەلگەن شىعىندى انىقتاۋ ٷستٸندە.
