پاندەميياعا بايلانىستى شەتەلدە تۇراتىن قازاق بالالارىنىڭ جازعى لاگەرلەرٸ ۋاقىتشا توقتاتىلدى. بۇل تۋرالى «وتانداستار قورى» كەاق ۆيتسە-پرەزيدەنتٸ ماعاۋييا سارباسوۆ ايتتى, دەپ حابارلايدى قازاقپارات.
«پاندەميياعا دەيٸن شەتەلدە تۇراتىن ەتنيكالىق قازاق بالالارىنا قازاقستاندا ەرتٷرلٸ جازعى لاگەرلەر (نازارباەۆ زيياتكەرلٸك مەكتەپتەرٸ, بالدەۋرەن, «تۋعان ەلگە ساياحات» بالالار تۋريستٸك پويىزى», «ZEREN» رەسپۋبليكالىق جازعى لاگەرٸ) ۇيىمداستىرىلاتىن. ونىڭ باسى-قاسىندا دٷنيەجٷزٸلٸك قازاقتار قاۋىمداستىعى جٷرەتٸن.
جالپى 2019 جىلى شەتەلدەن 600 بالا قازاقستانعا جازعى لاگەرلەرگە كەلدٸ. ولار ەكٸ اپتادا دومبىرا ساباعىنا قاتىسىپ, قازاق تٸلٸن ٷيرەنٸپ, اتاجۇرتىن كٶرٸپ, كەرەمەت مارقايىپ قايتتى. بٸراق, ٶكٸنٸشكە قاراي, 2020-2021 جىلدارى پاندەميياعا بايلانىستى جوبالار ۋاقىتشا توقتاتىلدى. دەگەمەن, بۇل جوبالار الداعى ۋاقىتتا جالعاسادى دەگەن سەنٸمدەمٸز», - دەدٸ م. سارباسوۆ ورتالىق كوممۋنيكاتسييالار قىزمەتٸندە ٶتكەن باسپاسٶز مەسليحاتىندا.
