فوتو: 24.kz
تٷركٸستان وبلىستىق تجد-نٸڭ جەكە قۇرامى قىزمەتٸ كٷشەيتٸلگەن رەجيمگە كٶشٸرٸلدٸ, دەپ حابارلايدى قازاقپارات.
«كازگيدرومەت» رمك بولجامىنا سەيكەس, تٷركٸستان وبلىسى اۋماعىندا 31 قاڭتار مەن 3 اقپان ارالىعىندا جاۋىن-شاشىن مول جاۋىپ, اۋا تەمپەراتۋراسى +12 گرادۋسقا كٶتەرٸلۋٸ مٷمكٸن. اۋا-رايىنىڭ بۇلايشا كٷرت جىلۋى سىردارييا ٶزەنٸنٸڭ جوعارعى اعىسىنان كەلگەن سۋدىڭ كٶبەيۋٸ, «شاردارا» سۋ قويماسىنىڭ مەرزٸمٸنەن بۇرىن تولۋىنا ەكەپ سوعۋ مٷمكٸن. سونداي-اق وبلىس اۋماعىنىڭ تاۋلى جوتالارىنان باستاۋ الاتىن ارىس, كەلەس, بادام, بورالداي, اقسۋ, شايان ٶزەندەرٸندە سۋدىڭ دەڭگەيٸ كٶتەرٸلٸپ, جاعدايدى كٷردەلەندٸرۋٸ ىقتيمال. سوندىقتان تٷركٸستان وبلىستىق تجد جەكە قۇرامى دا 28 قاڭتاردان باستاپ قىزمەتتٸڭ كٷشەيتٸلگەن تٷرٸنە اۋىستىرىلدى», - دەلٸنگەن دەپارتامەنت حابارلاماسىندا.
وبلىس اۋماعىندا سۋ تاسقىنى جاعدايىنا باقىلاۋ جٷرگٸزۋ جۇمىستارى تۇراقتى تٷردە جٷرٸپ جاتىر. سوڭعى اپتادا وبلىس اۋماعىندا 51 شاقىرىم كانال, 31 شاقىرىم ارىق-اتىزدار مەحانيكالىق تازارتۋدان ٶتكٸزٸلدٸ. بٶگەن ٶزەنٸندە 4,2 شاقىرىم جاعا بەكٸتۋ, نىعايتۋ جۇمىستارى جٷرگٸزٸلدٸ, سونداي-اق 14 شاقىرىم قاشىرتقى ارنالاردىڭ تٷبٸ تەرەڭدەتٸلٸپ, كەڭەيتٸلدٸ. وتىرار اۋدانى اۋماعىنداعى سىردارييا ٶزەنٸ بويىنداعى قورعانىس دامبالارى 10 جەرٸنەن نىعايتىلدى. بۇل باعىتتاعى جۇمىستار جالعاسىن تابۋدا. قۇم تولتىرىلعان قاپتىڭ سانى 48 مىڭعا جەتكٸزٸلٸپ, ينەرتتٸ ماتەريالداردىڭ قورى ارتتىرىلۋدا. 144 دانا موتوپومپا دايىندالدى. سىردارييا ٶزەنٸنٸڭ اعىنى كٷندەلٸكتٸ باقىلاۋعا الىندى.
«قازٸرگٸ كەزدە «شاردارا» سۋ قويماسىندا 4 ملرد 409 ملن تەكشە مەتردەن استام سۋ جينالعان. ياعني, سۋ قويماسى 85%-عا تولعان. بۇل ٶتكەن جىلدىڭ تيٸستٸ كەزەڭٸمەن سالىستىرعاندا 1 ملرد تەكشە مەترگە ارتىق. ال, «كٶكساراي» سۋ رەتتەگٸشٸنە ٶتكەن جىلمەن سالىستىرعاندا 1157 ملن. تەكشە مەتردەن ارتىق سۋ جينالعان. سىردارييا ٶزەنٸ ارقىلى «شاردارا» سۋ قويماسىنا كٶرشٸ ەلدەردەن ورتاشا ەسەپپەن سەكۋندىنا 1500 تەكشە مەتر سۋ كەلٸپ, سۋ قويمانىڭ تٶمەنگٸ اعىسىنا 1111 م3/سەك سۋ شىعارىلۋدا», - دەپ تولىقتىردى ۇيىم.
